Swami Samarth Told That Ego Hinders Progress Absolute Devotion Is Superior
Swami Samarth Teachings स्वामी समर्थ शिकवण: अहंकार प्रगतीस बाधक; निरपेक्ष भक्ती श्रेष्ठ
माणूस मेहनत आणि परिश्रमाच्या जोरावर यश मिळवत असतो. मात्र, त्याचा अहंकार आला की, त्याची अधोगतीकडे वाटचाल सुरु होते. आपल्या आराध्याची निस्सिम, निरपेक्ष भक्ती, सेवा केल्यास गुरुचा आशीर्वाद लाभदायक ठरून पुन्हा एकदा प्रगतीकडे वाटचाल करता येऊ शकते, अशी शिकवण स्वामी समर्थ महाराज देतात. जाणून घ्या...
महाराष्ट्र टाइम्स.कॉम30 Jul 2020, 10:22 am
ब्रह्मांडनायक अशी ओळख असलेल्या स्वामी समर्थ महाराजांना कोट्यवधी भक्त दररोज भजत-पूजत असतात. काही जणांच्या मुखी सदैव स्वामींचे नाव असते. भक्ती निरपेक्ष असावी. गुरुचा आशिर्वाद पाठिशी असणाऱ्यांना मग कशाचे भय राहत नाही. सत्कर्म, मेहनत, सातत्य, जिद्द, परिश्रम यांच्या जोरावर तो यश आणि प्रगतीच्या मार्गावर पुढे जात असतो. मात्र, यश आणि प्रगतीचे वारे अंगात भिनून डोक्यापर्यंत पोहोचले की, त्याला गर्व होतो आणि मग याचा पुढचा टप्पा म्हणजे अहंकार. माणूस एकदा अहंकारी झाला की, त्याला दुसरे चांगले काहीच दिसत नाही. कितीही ज्ञान पदरात पडले, तरी अहंकारी माणूस अधोगतीच्या मार्गाला लागतो. याचे उत्तम उदाहरण म्हणजे रावण. अहंकार प्रगतीला मारक ठरतो, असे आपण अनेकदा ऐकतो. स्वामी समर्थ महाराजांनी एका घटनेतून ते समाजाला पुनःप्रत्ययाला आणून दिले. नेमके काय घडले? जाणून घेऊया...
स्वामी समर्थ महाराज नृसिंह सरस्वतींचे अवतार आहेत, हे रामदासी बुवांना फारसे पटत नसते. रामदासी बुवा एका मठाचे महंत असतात. ते प्रचंड ज्ञानी, विद्वान असतात. परंतु, अहंकारी आणि फार गर्विष्ठ असतात. वेद शास्त्रार्थात भल्याभल्या विद्वांनांना ते चीतपट करत. एखाद्या व्यक्तीचा पराभव झाला की, त्याला दंड किंवा शिक्षा करायचे. शिक्षा म्हणून आपले पायताण डोक्यावर घेऊन उभे ठेवायचे.
स्वामी समर्थ महाराजांची शिकवण: श्रद्धा जरूर ठेवा, अंधश्रद्धा नको एक दिवस स्वामी तिथे येऊन मुक्कामाची परवानगी मागतात. महंतांच्या मठात जागा नसते. म्हणून ध्यान कक्षात केवळ एका तासासाठी मुक्काम करण्यास ते स्वामींना सांगतात. त्या ध्यान कक्षात स्वामींना अतिशय गाढ झोप लागते. एका तासानी महंत येतात आणि स्वामींना उठवतात. मात्र, स्वामी उठत नाहीत. अनेकदा आणि बराच वेळ प्रयत्न करूनही स्वामी जागे होत नाहीत म्हटल्यावर स्वामींना धडा शिकवावा, असे महतांच्या मनात येते. महंत बुवा खोलीला बाहेरून कुलूप लावून निघून जातात.
स्वामी समर्थ महाराजांचा उपदेशः सद्गुरुशी नेहमी एकनिष्ठ असावे स्वामी महंतांच्या मठात आले आहेत म्हटल्यावर स्वामी भक्त असणारे गोरे शास्त्री स्वामींचे दर्शन घेण्यासाठी येतात. महंत त्यांना सांगतात की, त्यांनी स्वामींना खोलीत डांबून ठेवले आहे. गोरेशास्त्री चपापतात आणि महंतांना सांगतात की, स्वामी चैतन्य स्वरुप आहेत. त्यांना कोणीही डांबून ठेऊ शकत नाहीत. शास्त्रीबुवांच्या मताला महंत फारशी किंमत देत नाहीत. गोरे शास्त्री स्वामींच्या खोलीच्या दाराबाहेर खिन्न मनानी बसून राहतात. थोड्यावेळाने ते तेथून बाहेर पडतात. फिरता फिरता ते एका सरोवरापाशी येतात आणि पाहतात ते काय, स्वामी सूर्याला अर्घ्य देत असतात. तेवढ्यात महंत रामदासी बुवाही तेथे पोहोचतात. स्वामींना पाहून महंत अगदी थबकतात. स्वामी बाहेर येतात. महंत आणि शास्त्रीबुवांबरोबर पुन्हा मठात येतात.
महंत खोलीचे दार उघडतात, तर तिथे स्वामी गाढ झोपलेले दिसतात. दुसरीकडे, त्यांचासोबतही स्वामी उभे असल्याचे ते पाहतात. एकाच ठिकाणी स्वामींची दोन रुपे पाहून ते अवाक होतात. काही काळ नेमके काय करावे आणि काय बोलावे, हेच त्यांना कळत नाही. शेवटी ते स्वामींचे पाय धरतात आणि त्यांना शरण जातात. बुवा, तुम्ही ज्ञानी आहात, विद्वान आहात. मात्र, अहंकार तुमच्या प्रगतीस बाधक आहे. अहंकाराने राग येतो आणि राग माणसाला राखेत मिळवतो. प्रचंड माहिती असूनही अहंकारामुळे प्रकाशाला कोणी कोंडू शकत नाही, ही साधी बाब आपल्या लक्षात आली नाही. ज्ञानापेक्षा भक्ती श्रेष्ठ असते. कारण ज्ञानात अपेक्षा असते. मात्र, भक्ती निरपेक्ष असते. अहंकार त्यागून निरपेक्ष भक्तीच्या मार्गावर पुढे गेलात, तर यशोशिखरावर नक्कीच पोहोचाल, अशी शिकवण स्वामी देतात. स्वामी वचनांनी महंत बुवांना त्यांची चूक उमगते आणि ते स्वामी भक्त बनतात.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.