वृत्तसंस्था, नवी दिल्ली
न्या. अकील कुरेशी यांचे नाव मध्य प्रदेश उच्च न्यायालयाच्या मुख्य न्यायमूर्तिपदासाठी पाठवण्याचा निर्णय सर्वोच्च न्यायालयाच्या कॉलेजियमने बदलला असून, न्या. कुरेशी यांचे नाव आता त्रिपुरा उच्च न्यायालयाच्या मुख्य न्यायमूर्तिपदासाठी पाठवण्यात आले आहे.
कॉलेजियमचा निर्णय सर्वोच्च न्यायालयाच्या वेबसाइटवर शुक्रवारी सायंकाळी प्रसिद्ध करण्यात आला आहे. कॉलेजियमच्या पाच सप्टेंबरला झालेल्या बैठकीमध्ये न्या. कुरेशी यांच्याशी संबंधित निर्णयात बदल करण्यात आल्याचे यात म्हटले आहे. यापूर्वी कॉलेजियमने न्या. कुरेशी यांच्या नावाची शिफारस मध्य प्रदेश उच्च न्यायालयाच्या मुख्य न्यायमूर्तिपदासाठी केली होती. मात्र, केंद्र सरकारने त्यावर काही आक्षेप घेतले होते. त्यानंतर गुजरात उच्च न्यायालयाच्या अॅडव्होकेट असोसिएशनने या मुद्द्यावर याचिका दाखल केली होती. कॉलेजियमने न्या. कुरेशी यांचे नाव १० मे रोजी सूचवूनही केंद्राने त्याबाबत अधिसूचना काढली नसल्याचा दावा असोसिएशनने केला होता. कॉलेजियमने न्या. कुरेशी यांच्याबाबत निर्णय घेतला असून, लवकरच तो जाहीर केला जाईल, असे सर्वोच्च न्यायालयाने यावरील सुनावणीत सांगितले होते.
ताहिलरमानी यांचा राजीनामा स्वीकारला
मद्रास उच्च न्यायालयाचे मुख्य न्यायमूर्ती व्ही. के. ताहिलरामानी यांचा राजीनामा स्वीकारण्यात आला आहे. सहा सप्टेंबरला त्यांचा राजीनामा स्वीकारण्यात आल्याचे सरकारी अधिसूचनेत नमूद केले आहे. मेघालय उच्च न्यायालयात आपल्या बदलीच्या निर्णयाबाबत कॉलेजियमने विचार करावा, अशी विनंती ताहिलरामानी यांनी केली होती. कॉलेजियमने ही विनंती मान्य केली नाही. त्यानंतर त्यांनी राजीनामा दिला. दरम्यान, न्या. व्ही. कोठारी यांची मद्रास उच्च न्यायालयाच्या प्रभारी मुख्य न्यायमूर्तिपदी नियुक्ती करण्यात आल्याचे दुसऱ्या अधिसूचनेत म्हटले आहे. ताहिलरामानी यांच्या बदलीच्या निर्णयानंतर निदर्शने झाली होती. त्यानंतर १२ सप्टेंबरला सर्वोच्च न्यायालयाने निवेदन जारी केले होते. मुख्य न्यायमूर्ती आणि वेगवेवेगळ्या उच्च न्यायालयाच्या न्यायाधीशांच्या बदल्यांची शिफारस आवश्यक कारणांवर आधारित असते, असे यात स्पष्ट करण्यात आले होते.