इंदुरीकर महाराज पुन्हा वादात; यूट्यूबवर व्हिडिओ टाकणाऱ्यांबद्दल केलं भयंकर वक्तव्य

अहमदनगर: माझ्या भाषणांचे व्हिडिओ परवानगी घेतल्याशिवाय यू ट्यूबवर अपलोड करून नका, असा इशारा देणारे आणि यासंबंधी अनेकदा तक्रारी केलेले समाजप्रबोधनकार निवृत्ती महाराज देशमुख इंदुरीकर यांनी आता यू ट्यूबर्सना थेट ‘शाप’च दिला आहे. ‘माझ्या भाषणाचे व्हिडिओ अपलोड करून पैसे कमावणाऱ्यांची मुले दिव्यांग जन्माला येतील,’ असं वक्तव्य इंदुरीकरांनी केलं आहे.

विविध वक्तव्यांमुळं सतत चर्चेत आणि वादात राहणाऱ्या इंदुरीकरांच्या अशा वक्तव्यात याची आणखी एक भर पडली आहे. मात्र, आपण अडचणीत येण्याचं खापर त्यांनी यूट्यूबर्सवर फोडलं आहे. यापूर्वीही त्यांनी अनेकदा यावरून टीका केली होती. यावेळी मात्र थेट शाप दिल्याप्रमाणेच वक्तव्य केलं. इंदुरीकर म्हणाले, माझ्या कीर्तनाचे व्हिडीओ यूट्यूबवर अपलोड करून आतापर्यंत चार हजार लोकांनी कोट्यवधी रुपये कमावले आहेत. त्यांना पैसे मोजायलाही वेळ नाही. मात्र त्यांच्यामुळेच मी सतत अडचणीत आलो आहे. माझ्या कीर्तनाच्या व्हिडीओ क्लिप्स यूट्यूबवर टाकणाऱ्यांची मुलं दिव्यांग जन्माला येतील,’ असं इंदुरीकर यांनी म्हटलं आहे. उपस्थितांनी त्यांना टाळ्या वाजवून साथही दिली. अकोल्यातील कौलखेड भागात राष्ट्रवादी काँग्रेसच्या एका पदाधिकाऱ्यानं एका कार्यक्रमानिमित्त इंदुरीकर यांचं कीर्तन आयोजित केलं होतं. त्यावेळी त्यांनी हे वक्तव्य केलं.

वाचा: युक्रेनमधील विद्यार्थ्यांच्या सुटकेचे श्रेय घेणाऱ्यांवर सुप्रिया सुळे बरसल्या, म्हणाल्या...

गेल्या दोन वर्षांपासून इंदुरीकर महाराज विविध वक्तव्यांमुळं अडचणीत आलेले आहेत. पुत्रप्राप्ती संबंधी केलेल्या एका वक्तव्यामुळं त्यांना न्यायालयीन खटल्यालाही सामोरं जावं लागलं आहे. यामध्ये त्यांना जिल्हास्तरावर दिलासा मिळाला असला तरी उच्च न्यायालयात प्रकरण प्रलंबित आहे.

या दरम्यान, इंदुरीकर यांनी त्यांच्या कीर्तनादरम्यान व्हिडिओ करण्यावर निर्बंध आणले आहेत. याशिवाय ज्यांनी आपल्या परवानगीशिवाय व्हिडिओ अपलोड केले आहेत, ते काढून टाकण्याचे आवाहन करताना कारवाईचा इशाराही त्यांनी दिला होता. एका प्रकरणात आपली फसवणूक झाल्याची तक्रारही त्यांनी गेल्याच महिन्यात जिल्हा पोलिस अधीक्षकांकडं केली होती. आता त्यांनी अशा लोकांचा कीर्तनातून जाहीर समाचार घेण्यास सुरवात केली आहे. त्यांनी यापूर्वी अनेकदा आपल्या शैलीत टीकाही केली होती. मात्र, आता थेट शाप दिल्याप्रमाणेच वक्तव्य केले आहे. त्यामुळं त्यांच्या या नव्या वक्तव्याची पुन्हा चर्चा सुरू झाली आहे.

वाचा: भयानक अपघात! धावत्या कंटेनरमधून पवनचक्कीचे पाते बोलेरोवर पडले आणि...