Sari Patients In The Ahmednagr District Rises To 42
'सारी'चा धोका वाढतोय; नगरमध्ये रुग्णसंख्या ४२ वर
राज्यात करोनाचा प्रादुर्भाव वाढत असताना औरंगाबाद आणि नगर जिल्ह्यांमध्ये 'सारी'च्या रुग्णांची संख्याही वाढताना दिसत आहे. त्यामुळे आरोग्य यंत्रणेवरील ताण आणखी वाढला आहे.
महाराष्ट्र टाइम्स.कॉम17 Apr 2020, 12:57 am
अहमदनगर: जिल्ह्यात 'सारी'चे (सिव्हीअर अॅक्युट रेस्पिरेटरी इलनेस) ११ एप्रिलपासून ते आजपर्यंत ४२ रुग्ण सापडले आहेत. त्यांच्यावर जिल्हा रुग्णालय आणि महात्मा फुले जीवनदायी योजने अंतर्गत मान्यता दिलेल्या विविध रुग्णालयांत उपचार सुरू आहेत. यामध्ये २३ पुरुष, १५ महिला आणि ४ मुलांचा समावेश आहे. तर 'करोना तपासणीच्या अनुषंगाने जिल्हा रुग्णालयाने पुण्याच्या लष्करी वैद्यकीय महाविद्यालयाकडे पाठविलेल्या स्त्राव नमुन्यांपैकी २१ व्यक्तींचे स्त्राव चाचणी अहवाल आज प्राप्त झाले असून ते निगेटीव्ह आले आहेत. जिल्हा शल्य चिकित्सक डॉ. प्रदीपकुमार मुरंबीकर यांनी ही माहिती दिली.
जिल्ह्यामध्ये 'करोना' रुग्णांच्या शोधाबरोबरच आता ‘सारी’ रुग्णांचेही तत्काळ निदान व्हावे, यासाठी जिल्हा प्रशासन सतर्क झाले आहे. 'सारी' व 'करोना'ची लक्षणे ही जवळपास सारखीच आहेत. त्यामुळेच 'सारी'चा रुग्ण 'करोना'चा आहे का, हे तपासण्यासाठी 'सारी'च्या रुग्णांचे स्वॅब घेतले जात आहेत. 'करोना'चे संक्रमण थांबविण्यासाठी 'सारी'च्या रुग्णांवरही बारीक लक्ष ठेवले जात आहे.
दरम्यान, जिल्ह्यात आतापर्यंत २७ करोनाबाधीत रुग्ण आढळले आहेत. करोना तपासणीसाठी जिल्हा रुग्णालयाच्या वतीने आतापर्यंत १ हजार २१५ व्यक्तींचे स्त्राव नमुने चाचणीसाठी पाठविण्यात आले होते. त्यातील १ हजार १४५ व्यक्तींचे स्त्राव चाचणी अहवाल निगेटिव्ह आले आहेत. काल पाठवलेले १३ आणि आज पाठविण्यात आलेले २० असे ३३ स्त्राव अहवालाची अद्याप प्रतीक्षा आहे. ज्या अहवालाची प्रतीक्षा आहे त्यामध्ये १४ दिवस पूर्ण केलेल्या आणखी दोघा परदेशी नागरिकांचा समावेश आहे.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.