म. टा. प्रतिनिधी, नगर
नगर जिल्ह्यातील जवळपास दीड हजारांपेक्षा जास्त प्राथमिक शिक्षकांच्या बदल्या ऑनलाइन पद्धतीने करण्यात आल्या आहेत. या शिक्षकांनी बदलीसाठी ऑनलाइन भरलेल्या माहितीच्या आधारावर राज्यस्तरावरून या बदल्या करण्यात आल्या. त्यामुळे शिक्षकांनी बदलीसाठी अर्ज करताना अर्जासोबत भरलेल्या माहितीची तपासणी केली जाणार आहे. शिक्षणाधिकाऱ्यांना अहवाल सादर करण्याचे आदेश तालुकास्तरावरील अधिकाऱ्यांना गुरुवारी शिक्षण समिती सभेत देण्यात आले. जिल्हा परिषदेच्या शिक्षण समितीची सभा गुरुवारी पार पडली. या सभेत विविध मुद्द्यांवर चर्चा होऊन निर्णय घेण्यात आले.
जिल्हा परिषद प्राथमिक शिक्षकांच्या बदल्या ऑनलाइन पद्धतीने होत आहेत. यावर्षातही ऑनलाइन पद्धतीने बदल्या करण्यात आल्या होत्या. यासाठी जिल्ह्यातील बदलीपात्र शिक्षकांकडून अर्ज मागवण्यात आले होते. बदलीसाठी अर्ज करताना शिक्षकांनी आवश्यक माहिती भरली होती. शिक्षकांनी भरलेल्या या माहितीची शिक्षण विभागाने तपासणी केली नसल्याचा आरोप सदस्यांनी सभेत केला. शिक्षण विभागाने याकडे दुर्लक्ष केल्याचे सदस्यांनी स्पष्ट केले. शिक्षण विभागाच्या या कारभारावर सदस्यांनी तीव्र शब्दांत नाराजी व्यक्त केली. त्यामुळे शिक्षकांनी ऑनलाइन भरलेल्या माहितीची तपासणी करण्याचे आदेश या सभेत देण्यात आले. त्यामुळे शिक्षकांनी बदलीसाठी भरलेल्या माहितीची तपासणी होणार आहे. या आधी मागील वर्षातही अशाच पद्धतीने तपासणी करण्यात आली होती. त्यानंतर या वेळीही माहिती तपासणी करण्याचा निर्णय घेण्यात आला आहे.
तपासणी पूर्ण झाल्यानंतर शिक्षणाधिकाऱ्यांना अहवाल सादर करण्याच्या सूचना अधिकाऱ्यांना देण्यात आला. या व्यतिरिक्त सभेत शिक्षण विभागाच्या अन्य योजनांचा आढावा घेण्यात आला. तसेच दोन पेक्षा जास्त अपत्य असणाऱ्या शिक्षकांची यादी तयार करण्याच्या सूचना देण्यात आल्या. या शिक्षकांची माहिती गोळा करण्यात येणार असून यासाठी ३१ ऑगस्टपर्यंत मुदत देण्यात आली आहे. या सभेत शिक्षण विभागांतर्गत जिल्ह्यात ठिकठिकाणी सुरू असणाऱ्या बांधकामांचा आढावा घेण्यात आला.