म. टा. प्रतिनिधी, वैजापूर
भारतीय जनता पक्षाच्या नवनिर्वाचित नगराध्यक्षा शिल्पा परदेशी व नऊ नगरसेवकांनी राज्याचे मुख्यमंत्री देवेंद्र फडणविस यांची औरंगाबाद येथे भेट घेतली. याप्रसंगी फडणविस यांनी नवनिर्वाचित सदस्यांचा सत्कार केला. 'वैजापुरकरांसाठी निधीची कमतरता भासू देणार नाही,' अशी ग्वाही नगराध्यक्षा परदेशी यांना दिली.
वैजापूरकरांनी सबका साथ सबका विकास या भाजपाच्या ब्रीदवाक्याला दिलेला प्रतिसाद माझ्या कायम आठवणीत राहील, असे मुख्यमंत्री म्हणाले. घरकुल, भूमिगत गटार, समाजमंदिर, घनकचरा व्यवस्थापनासाठी निधी देण्यात येईल, असे आश्वासन दिले. मुख्यमंत्री फडणविस यांच्यासह विधानसभा अध्यक्ष हरिभाऊ बागडे, प्रदेशाध्यक्ष खासदार रावसाहेब दानवे यांच्या उपस्थितीत औरंगाबाद येथील निर्लेप सभागृहात शनिवारी कार्यक्रम आयोजित करण्यात आला होता. याप्रसंगी नगराध्यक्षा शिल्पा परदेशी, माजी नगराध्यक्ष डॉ. दिनेश परदेशी यांचा त्यांनी सत्कार केला. भाजपचे जिल्हा सरचिटणीस मोहन आहेर, तालुकाध्यक्ष नारात्रण तुपे, ज्ञानेश्वर इंगळे, धोंडिरामसिंह राजपूत, नगरसेवक दशरथ बनकर, शैलेश चव्हाण, गणेश खैरे, शोभा भुजबळ, लता मगर, जयश्री राजपूत, माधुरी बनकर, संगिता गायकवाड, अनिता तांबे यांनी मुख्यमंत्री फडणविस यांची भेट घेतली. याप्रसंगी डॉ. दीपक परदेशी, उमेश वाळेकर, मजीद कुरेशी, डॉ. अनिल जोशी उपस्थित होते.