म. टा. प्रतिनिधी, कोल्हापूर
सांगलीतील अनिकेत कोथळे मृत्यूप्रकरण आणि वारणानगर लूट प्रकरणाच्या तपासाचा राज्य गुन्हे (सीआयडी) अन्वेषणचे अपर पोलिस महासंचालक संजयकुमार यांनी शुक्रवारी सायंकाळी आढावा घेतला. दोन्हीही घटनांची सखोल चौकशी करून तपासात तांत्रिक उणिवा राहू नये, याची दक्षता घेण्याच्या सूचना त्यांनी अधिकाऱ्यांना दिल्या.
अपर पोलिस महासंचालक संजयकुमार शुक्रवारी दुपारी कोल्हापुरात दाखल झाले. त्यांच्या दौऱ्यांबाबत गोपनीयता पाळण्यात आली. सांगली येथील अधिकाऱ्यांसमवेत सुमारे चार तास बैठक घेतली. सागंलीतील कोथळे मृत्यू प्रकरणातील मुख्य संशयित आणि निलंबित पोलिस उपनिरीक्षक युवराज कामटे यांनी घटनेदिवशी शहर पोलिस ठाण्यात दाखल केलेल्या गुन्ह्याच्या अनुषंगाने तपशीलवार माहिती घेतली. कामटेसह अन्य संशयितांवर न्यायालयात दाखल झालेल्या दोषारोपपत्राचा आढावा घेऊन पुरवणी दोषारोपपत्र दाखल करण्याच्या तपास अधिकाऱ्यांना सूचना केल्या. वारणानगर येथील कोट्यावधी रुपयांची चोरीप्रकरणाच्या तपासाची माहिती घेतली. सीआयडीचे पोलिस अधीक्षक डॉ. दिनेश बारी यांनी चोरी प्रकरणातील आरोपींना जामीन झाल्याने साक्षीदारांवर दबाव तंत्राचा अवलंब होण्याची शक्यता नाकारता येणार नाही. त्यामुळे मंजूर झालेल्या जामीन अर्जाला आव्हान देण्यासाठी तत्काळ मुंबई उच्च न्यायालयात अपिल दाखल करण्याच्या सूचना दिल्या. आरोपींच्या विरोधात भक्कम पुरावे हजर करण्यासाठी तपास यंत्रणेतील सर्व घटकांनी दक्षता घ्यावी.