मुंबई :
धोबीतलाव येथील राज्य सरकारच्या जी. टी. रुग्णालय इमारतीत सुगावा लागलेल्या बेकायदा अस्थिव्यंग इम्प्लांट (रोपण) सामग्रीच्या धंद्याची व्याप्ती नांदेडप्रमाणेच नाशिक, पुणे, अहमदनगर, यवतमाळ व बीडपर्यंत पोहोचली असल्याचे अन्न व औषध प्रशासनाच्या (एफडीए) छापेसत्रामध्ये उघड झाले आहे. गुरुवारी मुंबईतच ग्रॅन्ट रोड येथे आणखी एका वितरकावर टाकलेल्या छाप्यामध्ये तब्बल ४० लाखांची विनापरवाना वैद्यकसामग्री जप्त करण्यात आली. छापेसत्रामुळे राज्यभरात अस्थिव्यंगोपचार, शस्त्रक्रियांमध्ये हात, पाय, गुडघे व हाडजोडणीसाठी वापरल्या जाणाऱ्या सामग्रीच्या दर्जाबाबत व रुग्णांना मिळणाऱ्या सेवेबाबतच शंका उत्पन्न झाली आहे.
जीटी रुग्णालयाच्या इमारतीतील छाप्यामध्ये विनीत पिंपळे हा मेडिकल सर्जिकल अॅन्ड हॉस्पिटल इक्विपमेन्ट नावाने अस्थिव्यंगावरील इम्प्लांटची खरेदी-विक्री करीत असल्याचे आढळले होते व त्याच्याकडे ४ लाखांची सामग्री सापडली होती. त्याचे धागेदोरे राज्यभर सापडले. प्रथम नांदेडमध्ये एक कोटींचा साठा जप्त करण्यात आला. त्यानंतर नाशिकमध्ये ३ लाख, पुण्यात साडेपाच लाख, अहमदनगरमध्ये सहा लाख, यवतमाळमध्ये ४ लाख व बीडमध्ये १ लाख रुपयांची विनापरवाना साठवलेली इम्प्लांट सामग्री जप्त करण्यात आली. राज्यभर छापेसत्र सुरू असतानाच गुरुवारी ग्रॅन्टरोडच्या बलराम भवन येथे रॉयल मेडिमेड कं. लि. या कंपनीमध्ये सापडलेल्या ४० लाखांच्या विनापरवाना सामग्रीचे तर योग्यरीत्या पॅकेजिंगही केलेले नव्हते. राजकोट व दिल्लीचे उत्पादक असले, तरी त्यांचा उत्पादनाचा तपशील त्यात नव्हता. ही कंपनी आठ ते दहा जणांना इम्प्लान्ट सामग्रीचा पुरवठा करीत होती.
सर्वच विनापरवाना सुरू असल्याने विक्रीकर व इतर करभरणा करण्याचाही प्रश्नच नव्हता व त्यामुळे मिळणाऱ्या लाभाचे आमीष दाखवून ते रुग्णांना सवलतीत विक्री करीत असावेत, असा संशय आहे. या प्रकरणात ठिकठिकाणचे डॉक्टर किंवा रुग्णालयांचेही काही साटेलोटे होते का, याचा तपास आता सुरू आहे.
कुलूप तोडून ताबा
पिंपळे ज्या रूममध्ये होता, ती स्टोअर रूम होती व त्याची चावी आमच्याकडे होती. मात्र हा प्रकार उघड झाल्यानंतर त्याची खातरजमा केली असता कुलूप व चावी जुळून आली नाही. याचा अर्थ त्याने पहिले कुलूप तोडून स्टोअररूमचा ताबा घेतला असावा, अशी माहिती ‘मार्ड’चे अध्यक्ष डॉ. शैलेंद्र आनंदे यांनी दिली. मार्डकडून वॉर्डनच्या उपस्थितीतच रूम्सचे वाटप होते व त्यानंतर प्रत्येक ठिकाणी लक्ष ठेवणे शक्य होत नाही. मात्र येथे सुरक्षेच्या मोठ्या समस्या आहेत, याकडे त्यांनी लक्ष वेधले.
विनापरवाना इम्प्लांटची खरेदी-विक्री करणारा विनीत पिंपळे राज्य सरकारच्या जी. टी. रुग्णालयाच्या इमारतीत कोणामुळे ठाण मांडून होता? त्याचे डॉक्टरांशी काही साटेलोटे होते का? तो सवलतींच्या ऑफर देऊन रुग्णांना इम्प्लांटची विक्री करीत होता का व किती सरकारी रुग्णालयांत त्याचा शिरकाव होता, असे प्रश्न आता उपस्थित झाले आहेत. जीटी रुग्णालयप्रकरणाची चौकशी करणारी समिती या सर्व प्रश्नांचा तपास करणार असून सात दिवसांत अहवाल सादर करील, असे या रुग्णालयाच्या डीनपदाची जबाबदारी असलेले डॉ. तात्याराव लहाने यांनी सांगितले.
सरकारी रुग्णालयांमध्ये कोट्यवधींची इम्प्लांट खरेदी झाली असतानाही अनेक रुग्णांना अस्थिव्यंग शल्यविशारदांकडून बाहेरून इम्प्लांट खरेदी करण्यास पाठविले जाते, अशा तक्रारी या प्रकरणानंतर ऐकू आल्या आहेत. पिंपळेने अलिकडच्याच काळात जीटी व जेजे रुग्णालयांमध्ये तसेच खासगी व्यक्तींनाही इम्प्लांट विकल्याच्या पावत्या सापडल्याचे एफडीए अधिकाऱ्यांनी सांगितले.
पिंपळे याने सरकारी रुग्णालयातच ठाण मांडून धंदा उघडल्याबद्दल सर्वथरात आश्चर्य व्यक्त होत आहे. डॉ. लहाने यांना मात्र हे आक्षेप मान्य नाहीत. ‘मटा’शी बोलताना डॉ. लहाने यांनी सांगितले की, या इमारतीतील रूम्स निवासी डॉक्टरांना देण्याचे काम मार्डवाले करतात व मार्डच्या पदाधिकाऱ्यांनी ही रूम कोणाला व कशी दिली, त्याची निश्चितच चौकशी करू. मात्र ज्या इमारतीत इतरही रहिवासी राहतात, त्यात कुणी पाहुणा आला असल्यास त्यांची नेहमी शहानिशा कशी करणार? तेव्हा पिंपळे कसा इथे राहत होता, त्यावर आमचे नियंत्रण असणे कठीण आहे. उलट पिंपळेबाबत शंका आल्यानेच जेजे रुग्णालयाचे अस्थिव्यंग विभागप्रमुख डॉ. एकनाथ पवार यांनी त्यांचे इम्प्लांट बंद केले होते. त्यामुळे अशाच डॉक्टरांची चौकशी समितीवर नियुक्ती करण्यात आली आहे. डॉ. पवार यांच्यासह जी. टी. रुग्णालयाचे डॉ. स्वप्नील केणी व उपअधीक्षक डॉ. विकास मैंदाड हे चौकशी समितीवर आहेत. पिंपळेने राज्यभरात कुठे इम्प्लांट विकले, कोणत्या सरकारी रुग्णालयात त्याने ते विकले का, या सगळ्याची चौकशी आम्ही करू. कोणत्या डॉक्टरांना त्यांनी पैसा पुरविला का व कोणाकोणाला सामग्री पुरविली, याची जंत्रीच आम्ही काढू, असे डॉ. लहाने यांनी सांगितले. ज्यांना असे इम्प्लांट बसविण्यात आले आहेत, त्यांच्याकडूनही माहिती घेण्यास सांगू. मात्र चौकशी पूर्ण होत नाही, तोपर्यंत या प्रकरणी आम्ही गुन्हा दाखल करू शकणार नाही, असे ते म्हणाले.
पिंपळेचे बंधू जीटी रुग्णालयातच अस्थिव्यंगाचे शल्यविशारद म्हणून कार्यरत होते, त्यांच्याकडूनही माहिती घेतली जाईल, असे डॉ. लहाने यांनी सांगितले.
धोबीतलाव येथील राज्य सरकारच्या जी. टी. रुग्णालय इमारतीत सुगावा लागलेल्या बेकायदा अस्थिव्यंग इम्प्लांट (रोपण) सामग्रीच्या धंद्याची व्याप्ती नांदेडप्रमाणेच नाशिक, पुणे, अहमदनगर, यवतमाळ व बीडपर्यंत पोहोचली असल्याचे अन्न व औषध प्रशासनाच्या (एफडीए) छापेसत्रामध्ये उघड झाले आहे. गुरुवारी मुंबईतच ग्रॅन्ट रोड येथे आणखी एका वितरकावर टाकलेल्या छाप्यामध्ये तब्बल ४० लाखांची विनापरवाना वैद्यकसामग्री जप्त करण्यात आली. छापेसत्रामुळे राज्यभरात अस्थिव्यंगोपचार, शस्त्रक्रियांमध्ये हात, पाय, गुडघे व हाडजोडणीसाठी वापरल्या जाणाऱ्या सामग्रीच्या दर्जाबाबत व रुग्णांना मिळणाऱ्या सेवेबाबतच शंका उत्पन्न झाली आहे.
जीटी रुग्णालयाच्या इमारतीतील छाप्यामध्ये विनीत पिंपळे हा मेडिकल सर्जिकल अॅन्ड हॉस्पिटल इक्विपमेन्ट नावाने अस्थिव्यंगावरील इम्प्लांटची खरेदी-विक्री करीत असल्याचे आढळले होते व त्याच्याकडे ४ लाखांची सामग्री सापडली होती. त्याचे धागेदोरे राज्यभर सापडले. प्रथम नांदेडमध्ये एक कोटींचा साठा जप्त करण्यात आला. त्यानंतर नाशिकमध्ये ३ लाख, पुण्यात साडेपाच लाख, अहमदनगरमध्ये सहा लाख, यवतमाळमध्ये ४ लाख व बीडमध्ये १ लाख रुपयांची विनापरवाना साठवलेली इम्प्लांट सामग्री जप्त करण्यात आली. राज्यभर छापेसत्र सुरू असतानाच गुरुवारी ग्रॅन्टरोडच्या बलराम भवन येथे रॉयल मेडिमेड कं. लि. या कंपनीमध्ये सापडलेल्या ४० लाखांच्या विनापरवाना सामग्रीचे तर योग्यरीत्या पॅकेजिंगही केलेले नव्हते. राजकोट व दिल्लीचे उत्पादक असले, तरी त्यांचा उत्पादनाचा तपशील त्यात नव्हता. ही कंपनी आठ ते दहा जणांना इम्प्लान्ट सामग्रीचा पुरवठा करीत होती.
सर्वच विनापरवाना सुरू असल्याने विक्रीकर व इतर करभरणा करण्याचाही प्रश्नच नव्हता व त्यामुळे मिळणाऱ्या लाभाचे आमीष दाखवून ते रुग्णांना सवलतीत विक्री करीत असावेत, असा संशय आहे. या प्रकरणात ठिकठिकाणचे डॉक्टर किंवा रुग्णालयांचेही काही साटेलोटे होते का, याचा तपास आता सुरू आहे.
कुलूप तोडून ताबा
पिंपळे ज्या रूममध्ये होता, ती स्टोअर रूम होती व त्याची चावी आमच्याकडे होती. मात्र हा प्रकार उघड झाल्यानंतर त्याची खातरजमा केली असता कुलूप व चावी जुळून आली नाही. याचा अर्थ त्याने पहिले कुलूप तोडून स्टोअररूमचा ताबा घेतला असावा, अशी माहिती ‘मार्ड’चे अध्यक्ष डॉ. शैलेंद्र आनंदे यांनी दिली. मार्डकडून वॉर्डनच्या उपस्थितीतच रूम्सचे वाटप होते व त्यानंतर प्रत्येक ठिकाणी लक्ष ठेवणे शक्य होत नाही. मात्र येथे सुरक्षेच्या मोठ्या समस्या आहेत, याकडे त्यांनी लक्ष वेधले.
विनापरवाना इम्प्लांटची खरेदी-विक्री करणारा विनीत पिंपळे राज्य सरकारच्या जी. टी. रुग्णालयाच्या इमारतीत कोणामुळे ठाण मांडून होता? त्याचे डॉक्टरांशी काही साटेलोटे होते का? तो सवलतींच्या ऑफर देऊन रुग्णांना इम्प्लांटची विक्री करीत होता का व किती सरकारी रुग्णालयांत त्याचा शिरकाव होता, असे प्रश्न आता उपस्थित झाले आहेत. जीटी रुग्णालयप्रकरणाची चौकशी करणारी समिती या सर्व प्रश्नांचा तपास करणार असून सात दिवसांत अहवाल सादर करील, असे या रुग्णालयाच्या डीनपदाची जबाबदारी असलेले डॉ. तात्याराव लहाने यांनी सांगितले.
सरकारी रुग्णालयांमध्ये कोट्यवधींची इम्प्लांट खरेदी झाली असतानाही अनेक रुग्णांना अस्थिव्यंग शल्यविशारदांकडून बाहेरून इम्प्लांट खरेदी करण्यास पाठविले जाते, अशा तक्रारी या प्रकरणानंतर ऐकू आल्या आहेत. पिंपळेने अलिकडच्याच काळात जीटी व जेजे रुग्णालयांमध्ये तसेच खासगी व्यक्तींनाही इम्प्लांट विकल्याच्या पावत्या सापडल्याचे एफडीए अधिकाऱ्यांनी सांगितले.
पिंपळे याने सरकारी रुग्णालयातच ठाण मांडून धंदा उघडल्याबद्दल सर्वथरात आश्चर्य व्यक्त होत आहे. डॉ. लहाने यांना मात्र हे आक्षेप मान्य नाहीत. ‘मटा’शी बोलताना डॉ. लहाने यांनी सांगितले की, या इमारतीतील रूम्स निवासी डॉक्टरांना देण्याचे काम मार्डवाले करतात व मार्डच्या पदाधिकाऱ्यांनी ही रूम कोणाला व कशी दिली, त्याची निश्चितच चौकशी करू. मात्र ज्या इमारतीत इतरही रहिवासी राहतात, त्यात कुणी पाहुणा आला असल्यास त्यांची नेहमी शहानिशा कशी करणार? तेव्हा पिंपळे कसा इथे राहत होता, त्यावर आमचे नियंत्रण असणे कठीण आहे. उलट पिंपळेबाबत शंका आल्यानेच जेजे रुग्णालयाचे अस्थिव्यंग विभागप्रमुख डॉ. एकनाथ पवार यांनी त्यांचे इम्प्लांट बंद केले होते. त्यामुळे अशाच डॉक्टरांची चौकशी समितीवर नियुक्ती करण्यात आली आहे. डॉ. पवार यांच्यासह जी. टी. रुग्णालयाचे डॉ. स्वप्नील केणी व उपअधीक्षक डॉ. विकास मैंदाड हे चौकशी समितीवर आहेत. पिंपळेने राज्यभरात कुठे इम्प्लांट विकले, कोणत्या सरकारी रुग्णालयात त्याने ते विकले का, या सगळ्याची चौकशी आम्ही करू. कोणत्या डॉक्टरांना त्यांनी पैसा पुरविला का व कोणाकोणाला सामग्री पुरविली, याची जंत्रीच आम्ही काढू, असे डॉ. लहाने यांनी सांगितले. ज्यांना असे इम्प्लांट बसविण्यात आले आहेत, त्यांच्याकडूनही माहिती घेण्यास सांगू. मात्र चौकशी पूर्ण होत नाही, तोपर्यंत या प्रकरणी आम्ही गुन्हा दाखल करू शकणार नाही, असे ते म्हणाले.
पिंपळेचे बंधू जीटी रुग्णालयातच अस्थिव्यंगाचे शल्यविशारद म्हणून कार्यरत होते, त्यांच्याकडूनही माहिती घेतली जाईल, असे डॉ. लहाने यांनी सांगितले.