म. टा. खास प्रतिनिधी, मुंबई
शिवसेनेचे उपविभागप्रमुख चंद्रशेखर जाधव (५५) यांच्यावर गुरुवारी सकाळी विक्रोळी येथे एका तरुणाने गोळी झाडली. यात जाधव जखमी झाले असून, त्यांच्यावर उपचार सुरू आहेत. दुसरीकडे गोळीबार करणाऱ्या अभय सिंह (२२) याला स्थानिकांनी पकडून मारहाण केली. परिसरातील पुनर्विकास प्रकल्पाच्या वादातून हा हल्ला करण्यात आल्याचा संशय व्यक्त होत आहे.
विक्रोळीच्या टागोरनगर परिसरातील साईबाबा मंदिराच्या कार्यालयात गुरुवारी सकाळी ७च्या सुमारास चंद्रशेखर जाधव काही रहिवाशांसोबत चर्चा करीत होते. त्यांचा मुलगाही यावेळी उपस्थित होता. याचवेळी अभय थेट कार्यालयात घुसला आणि काही कळण्याआधीच त्याने जाधव यांच्यावर गोळी झाडली. ही गोळी जाधव यांच्या खांद्यातून आरपार गेली. त्यांच्या मुलाने हल्लेखोराचा प्रतिकार करण्याचा प्रयत्न करताच त्याने आणखी चार गोळ्या झाडल्या आणि पळून जाऊ लागला. गोळीबाराचा आवाज आणि जाधव यांची आरडाओरड ऐकून शेजारच्या व्यायामशाळेतील तरुणांनी धाव घेत पळण्याच्या प्रयत्नात असलेल्या अभयला पकडून बेदम मारहाण केली.
घटनेची माहिती मिळताच विक्रोळी पोलिसांचे पथक घटनस्थळी पोहोचले. जाधव यांना तत्काळ गोदरेज रुग्णालयात, तर अभयला राजावाडी रुग्णालयात नेण्यात आले. जाधव यांची प्रकृती स्थिर असल्याचे पोलिसांनी सांगितले. दरम्यान, अभयविरोधात विक्रोळी पोलिस ठाण्यात गुन्हा दाखल करण्यात आला असून, चौकशीनंतर या हल्ल्याचे नेमके कारण स्प्ष्ट होईल, असे पोलिसांनी म्हटले आहे.
संघटित टोळीचा हात?
विक्रोळी परिसरात पुनर्विकासाचे अनेक प्रकल्प रखडले आहेत, तर काही सुरू आहेत. म्हाडा, खासगी इमारतींचा पुनर्विकास, स्थानिक विभागातील विविध कंत्राटे यांमध्ये जाधव सक्रिय होते. यावरून अनेकदा त्यांना धमक्याही आल्या होत्या. या पार्श्वभूमीवर यामागे संघटित टोळीचा हात असावा, असा पोलिसांचा प्राथमिक अंदाज आहे. अभय हा उत्तर प्रदेश येथील असून, त्याने वापरलेले पिस्तूल अद्ययावत आहे. जाधव यांच्यावर हल्ल्यासाठी त्याला सुपारी देण्यात आली असावी, असाही पोलिसांचा संशय आहे.