म. टा. वृत्तसेवा, सातपूर
विधानसभेच्या निवडणुकीची रंगत वाढली आहे. येत्या सोमवारी (दि. २१) मतदान प्रक्रिया पार पडणार असल्याने पोलिसांवर मोठी जबाबदारी आहे. अचानक राजकीय वाद उद्भविल्यास आणि दंगल उसळल्यावर नियंत्रण कसे मिळवायचे याबाबत सातपूर पोलिसांकडून दंगल नियंत्रण प्रात्याक्षिक घेण्यात आले.
सातपूर गाव, सातपूर कॉलनी, अशोनगररोडवर पोलिसांनी संचनल करत दंगल झाल्यावर काय काळजी घेतली पाहिजे, याबाबत प्रात्याक्षिक केले. सातपूर पोलिस स्टेशनचे वरिष्ठ निरीक्षक विलास जाधव यांच्यासह सातपूर पोलिस स्टेशनचे कर्मचारी, आरसीएफ, होमगार्ड व इतर विभागातील पोलिस कर्मचारी दंगल नियंत्रण प्रात्याक्षिकामध्ये सहभागी झाले होते. अचानक आलेल्या पोलिसांच्या फौजफाट्यामुळे नेमके काय झाले, असा प्रश्न महिलांना पडला होता. परंतु, निवडणुकीच्या पार्श्वभूमीवर पोलिसांचे संचलन असल्याचे समजताच महिलांचा गैरसमज दूर झाला.