म. टा. खास प्रतिनिधी, नाशिक
काही महिन्यांपूर्वी हात उसने घेतलेल्या पैशांच्या वादातून अशोक भांगरे या व्यक्तीची हत्या केल्याप्रकरणी घोटी पोलिसांनी तिघा संशयितांना अटक केली. जखमी भांगरे यांच्यावर सिव्हिल हॉस्पिटलमध्ये उपचार सुरू असताना शुक्रवारी (दि. २७) त्यांचा मृत्यू झाला.
सुदाम गंगाधर हिंदोळे (खैरगाव), बाळू किसन फोडसे (रा. टाकेद) आणि कृष्णा खडके (रा. शेणवड) अशी हत्येप्रकरणी अटक करण्यात आलेल्या आरोपींची नावे आहेत. १५ डिसेंबर रोजी रात्री ८ ते साडेआठ वाजेच्या दरम्यान हल्ल्याचा प्रकार घडला होता. घोटी रेल्वे गेटजवळील मद्य दुकानातून दारू विकत घेऊन आरोपी चायनीज फुड्सच्या दुकानात गेले. तिथे भांगरे आला. दारू पिताना चार ते पाच महिन्यांपूर्वी हातउसने घेतलेल्या पैशांची आरोपी सुदाम याने भांगरेकडे मागणी केली. वाद वाढल्याने चायनीज फुड्स दुकानदाराने चौघांना दुकानाबाहेर काढले. त्यानंतर रस्त्याच्या मोकळ्या जागेत पुन्हा वाद झाले. तेथे आरोपींनी भांगरेस जबर मारहाण केली. जखमी भांगरेवर सिव्हिल हॉस्पिटलमध्ये उपचार सुरू होते. उपचारादरम्यान भांगरेचा मृत्यू झाला. या प्रकरणी मारहाणीचा गुन्हा दाखल असल्याने पोलिसांनी त्यात हत्येचे कलम वाढविण्यात आले. या घटनेचा तपास करताना पोलिसांनी सीसीटीव्हीसह स्थानिक पातळीवर चौकशी केली. त्यानुसार वरील संशयितांना अटक करण्यात आली. संशयितांनी गुन्ह्याची कबुली दिली आहे. पोलिस अधीक्षक डॉ. आरती सिंग यांच्या मार्गदर्शनाखली पोलिस निरीक्षक स्थानिक गुन्हे शाखेचे के. के. पाटील, सहाय्यक पोलिस निरीक्षक स्वप्निल शिंपी, अनिल वाघ, जालिंदर पळे, सहाय्यक पोलिस उपनिरीक्षक नवनाथ गुरूळे, हवालदार बंडू ठाकरे, शिवाजी जुंद्रे, पोलिस नाईक संदीप हांडगे, कॉन्स्टेबल प्रदीप बहिरम, संदीप लगड, चालक कॉन्स्टेबल योगेश गुमलाडू यांच्या पथकाने ही कारवाई केली.