लोगो - मटा हेल्पलाइन
म. टा. प्रतिनिधी, नाशिक
माझं वय आता ९१ आहे. त्यामुळे आरोग्याच्या तक्रारी असतात. पेन्शन मिळते त्यातून काही पैसे साठवतो. एक एफडी केली आहे, त्याचे मिळालेले व्याज आणि ठेवणीतले पैसे या मुलांना देतो आहे. मला पैशांची गरज असली तरी या मुलांना ती अधिक आहे, असे मनापासून वाटते. म्हणूनच ही मदत. रामदास कॉलनी, कॅनडा कॉर्नर भागात राहणारे महादेव पारूंडेकर आजोबा हळूवार पावले टाकीत मटाच्या कार्यालयात आले. आणि त्यांनी त्यांच्याकडचे चेक सुपूर्द केले.
१९८५ मध्ये गोळे कॉलनी पोस्ट ऑफिसमधून ते सेवानिवृत्त झाले. पोस्टात कार्यरत असताना २००५ मध्ये त्यांना हार्ट अॅटॅक आला होता. सध्या त्यांना मिळणाऱ्या पेन्शनमधून ते हृदयरोग व इतर आजारांवरील औषधांचा खर्च करतात. असे असताना सामाजिक बांधिलकी जपत मेहनती व बुध्दिवान विद्यार्थ्यांना ऐच्छिक यश मिळवण्यासाठी त्यांनी आर्थिक मदत देऊ केलीय. यासाठी त्यांनी पेन्शनमधील काही रक्कम आणि एफडीवर मिळणारे व्याज तसेच स्वतःजवळील इतर रक्कम एकत्र करून प्रत्येक विद्यार्थ्याच्या नावे चेक दिला आहे. ते म्हणाले की, 'चार ते पाच वर्षांचा असताना वडील वारले. त्यानंतर आईने सांभाळ केला. मुंबईतील महानगरपालिकेच्या शाळेत शिक्षण झाले. पाच भावंडे होतो. सर्वजण मिळून काम करायचो. त्यातून मिळणाऱ्या पैशांतून शिक्षण पूर्ण केले. त्यामुळे खडतर परिस्थितीतून शिक्षण घेणे म्हणजे नेमके काय असते, याची संपूर्ण जाणीव आहे. याच हेतूने 'मटा हेल्पलाइन'सारख्या अभिनव उपक्रमाद्वारे विद्यार्थ्यांना 'शिक्षणपूर्ती'साठी मदत करत आहे. शिक्षण घेण्यासाठी एखाद्याला मदत करणे, यापेक्षा श्रेष्ठ कोणतेही दातृत्व नाही.'
हे आपले कर्तव्यच!
स्पर्धेच्या युगात टिकून राहण्यासाठी प्रत्येकाने उच्च शिक्षण घेणे गरजेचे आहे. समाजातील शिक्षणापासून वंचित राहतील अशा विद्यार्थ्यांना मदत करणे. हे आपले कर्तव्य असल्याचेही त्यांनी सांगितले. अतिशय बिकट परिस्थितीवर मात करीत शिक्षण घेण्यासाठी तळमळणाऱ्या विद्यार्थ्यांना आर्थिक पाठबळ देण्यासाठी 'महाराष्ट्र टाइम्स' तर्फे 'मटा हेल्पलाइन' हा सामाजिक उपक्रम राबविला जात आहे. या उपक्रमातून विद्यार्थ्यांना त्यांचे ऐच्छिक यश संपादित करता यावे. यासाठी ही आर्थिक मदत असल्याचे सांगताना पारुंडेकर आजोबांना गहिवरुन येते. ही मुले मोठी व्हावीत, त्यांच्या कुटुंबाला त्यांनी चांगले दिवस आणावेत, असा आशावाद त्यांनी व्यक्त केला.