म. टा. प्रतिनिधी, नाशिक
जिल्ह्यात २० ग्रामपंचायतींमध्ये सरपंचपदासह सदस्यांच्या ९१ जागांसाठी बुधवारी (दि. २६) मतदानप्रक्रिया राबविण्यात येणार आहे. सोमवारी (दि. २४) उमेदवारांनी प्रचार थांबविला. ऑक्टोबर ते मार्च या कालावधीत मुदत संपणाऱ्या २५ ग्रामपंचायतींमधील २४६ जागांसाठी निवडणूकप्रक्रिया राबविण्यात येत आहे. दोन ग्रामपंचायतींमध्ये सरपंचासह सर्व जागा, तर एका ग्रामपंचायतीत सरपंच वगळता सर्व सदस्य बिनविरोध निवडून आले आहेत. उर्वरित ९१ जागांकरिता बुधवारी सकाळी साडेसात ते सायंकाळी साडेपाच या वेळेत मतदान होणार आहे. इगतपुरी तालुक्यात ४८ जागांसाठी, त्र्यंबकेश्वरमध्ये १९, निफाडमधील १६, येवल्यातील सहा, तर बागलाणमधील दोन जागांसाठी मतदान होणार आहे. मतदान प्रक्रियेसाठीची तयारी प्रशासनाने पूर्ण केली आहे. गुरुवारी (दि.२७) सकाळी संबंधित तालुक्यांच्या तहसील कार्यालयांत मतमोजणी होणार आहे.