म. टा. विशेष प्रतिनिधी, मुंबई राज्यात राष्ट्रवादी काँग्रेसचे बंडखोर नेते अजित पवार यांच्या पाठिंब्यावर स्थापन झालेल्या भाजप सरकारबाबत सर्वोच्च न्यायालय आज, मंगळवारी काय निकाल देते याकडे सगळ्यांचे लक्ष लागले आहे. दुसरीकडे, विधानसभा अध्यक्षपदाची निवडणूक गुप्त पद्धतीने मतत्रिकेद्वारे होणार असल्याने ती महत्त्वाची ठरणार आहे. राज्यपालांच्या आदेशानंतर राज्य मंत्रिमंडळाची बैठक होईल. त्यात अधिवेशनाचा दिवस ठरेल. हंगामी अध्यक्ष निवडण्यासाठी ज्येष्ठ सदस्यांची नावे राज्यपालांकडे पाठविण्यात येतील. राज्यपाल हंगामी अध्यक्षांची निवड करतील. हंगामी अध्यक्ष निर्वाचित आमदारांना शपथ देतील. त्यानंतर विधानसभा अध्यक्षपदाची निवडणूक होईल. ही मतदान प्रक्रिया गुप्त पद्धतीने असेल. मतपत्रिकेतून मतदान होईल. यात पक्षाचा व्हीप असला तरी कोणी कोणत्या उमेदवाराला मतदान केले हे गुप्त असते. त्यामुळे मते फुटली तरी कोणाची मते फुटली हे सांगता येत नाही किंवा केवळ संशयावरून आमदारांवर कारवाई करता येत नाही. त्यामुळे या निवडणुकीत काय होणार हे महत्त्वाचे असेल. विधानसभा अध्यक्ष निवड झाली की सरकारवरील विश्वासदर्शक ठराव मांडला जाईल. विधिमंडळ नियम २३ अन्वये आवाजी मतदानानेही बहुमताचा ठराव मंजूर करण्याचे अधिकार विधानसभा
अध्यक्षांना आहेत.