म. टा. वृत्तसेवा, ठाणे
गांजा, अल्प्राझोलम टॅबलेटची तस्करी करणाऱ्या दोघांना पोलिसांनी भिवंडीतील किडवाईनगरमधून अटक केली आहे. तर एक आरोपी फरारी आहे. तर आरोपींकडून गांजा आणि टॅबलेट जप्त करण्यात आले असून शांतीनगर पोलिस ठाण्यात गुन्हा दाखल करण्यात आला आहे.
अरशद उर्फ अफजल इरफान अंसारी (३२) आणि मोहमद हुसेन सल्लाउद्दीन अन्सारी (२६) अशी या आरोपींची नावे आहेत. दोघेही भिवंडीतील वेगवेगळ्या भागात राहतात. शनिवारी दुपारी या दोघानाही पोलिसांनी ताब्यात घेतले होते. यावेळी दोघांचीही झडती घेण्यात आली असता अर्शद याच्याकडे रोख रक्कम आणि साडेचार किलो गांजा आणि त्याचा साथीदार मोहमद हुसेन याच्याकडे अल्प्राझोलम टॅबलेट मिळाल्या. पोलिसांनी एकूण गोळ्यांच्या ३० स्ट्रीप आरोपींकडून हस्तगत केल्या असून एकूण १५०च्या आसपास गोळ्या आहेत. एका स्ट्रीपमध्ये पाच गोळ्या असून आरोपींकडून हस्तगत केलेल्या एकूण मुद्देमालाची किमत ४४ हजार ८२५ रुपये इतकी आहे.