म. टा. वृत्तसेवा, कल्याण
खेळताना हातातील मोजपट्टी उंच फेकल्याने ती महावितरणच्या हायटेन्शन वायरच्या संपर्कात येऊन विजेचा तीव्र झटका बसल्याने सात वर्षीय मुलगा गंभीर जखमी झाल्याची घटना गुरुवारी नांदिवली येथे घडली. या दुर्घटनेत हा चिमुकला ३० टक्के भाजला असून गळ्याजवळ जखम झाल्याने त्याची प्रकृती गंभीर असल्याचे डॉक्टरांनी सांगितले.
कल्याण-मलंग रस्त्यावरील नांदिवली येथे मेहेक प्लाझा इमारती समोरून महावितरणच्या वीजवाहिन्या गेल्या आहेत. या इमारतीच्या दुसऱ्या मजल्यावर राहणाऱ्या सात वर्षीय मुलाने खेळण्याच्या नादात हातातील लोखंडी पट्टी वरच्या दिशेने फेकली. या मोजपट्टीचे एक टोक या मुलाच्या हातात होते तर दुसरे टोक महावितरणच्या तारांच्या संपर्कात आल्याने क्षणार्धात स्फोट झाला. या दुर्घटनेत या मुलाला जोरदार झटला बसला. त्याला उपचारासाठी खासगी रुग्णालयात दाखल करण्यात आले.
दरम्यान, याप्रकरणी महावितरणचे जनसंपर्क अधिकारी विजय दुधभाते यांच्याशी संपर्क साधला असता त्यांनी अशा कोणत्याही घटनेची नोंद नसल्याचे म्हटले. भूमिगत वाहिन्यांच्या कामाबाबत वरिष्ठ कार्यालयाकडून माहिती घेतली जाईल, असेही ते म्हणाले. तर आधी वाहिन्या टाकल्या जातात आणि त्यानंतर विकासक सर्व नियम धाब्यावर बसवून इमारती उभारतात. हायटेन्शन वायरशेजारी इमारत उभारणाऱ्या विकासकाचा हा दोष असल्याचा आरोप महावितरणच्या स्थानिक अधिकाऱ्यांनी केला आहे.