ठाणे ग्रामीण पोलिसांकडून तपास सुरू
म. टा. वृत्तसेवा, ठाणे
एटीएम मशीनमध्ये पैसे काढण्यासाठी येणाऱ्या ग्राहकांच्या एटीएम कार्डचा डाटा तसेच पासवर्ड मिळवण्यासाठी एटीएम मशीनला चक्क स्क्रीमर डिव्हाइस आणि छुपा कॅमेरा लावण्यात आल्याची धक्कादायक बाब मिरा रोडमध्ये पुढे आली आहे. परंतु या डिव्हाइसबाबत एटीएम मशीनमध्ये पैसे भरण्यासाठी येणाऱ्या कर्मचाऱ्याच्या निदर्शनास आल्याने संभाव्य धोका टळला असून याप्रकरणी अनोळखी व्यक्तीविरोधात नयानगर पोलिस ठाण्यात गुन्हा दाखल करण्यात आला आहे.
इस्ट्रो सिक्युरिटी सर्व्हिस प्रा. लिमिटेड कंपनीकडून बोरिवली ते डहाणू भागातील वेगवेगळ्या बँकाच्या एटीएम सेंटरचे हाऊस कीपिंग आणि देखरेख आदी कामे केली जातात. शिवाय एटीएमविषयी काही तक्रार असल्यास या कंपनीतर्फे पोलिस ठाण्यात तक्रार दिली जाते. ७ जून रोजी मिरा रोड पूर्वेकडील युनियन बँक ऑफ इंडियाच्या एटीएममध्ये रोकड भरण्यासाठी काही कर्मचारी आले होते. यावेळी एटीएम मशीनला वस्तू चिटकवली असल्याचे कर्मचाऱ्याच्या निदर्शनास आले. या कर्मचाऱ्याने तात्काळ कंपनीच्या सुपरवायझरला फोन करून याबाबत सांगितले. नंतर त्वरीत एटीएम सेंटरमध्ये चौकशीसाठी आलेल्या अधिकाऱ्यानी एटीएम मशीनची पाहणी केली. एटीएम मशीनच्या समोरील कीबोर्डवरील बाजूस एक प्लास्टिक पट्टी आणि त्यामध्ये छुपा कॅमेरा आणि एटीएम कार्ड टाकण्याच्या जागेवर प्लास्टिकचा स्क्रिमर डिव्हाइस लावण्यात आल्याचे आढळून आले. त्यानंतर कंपनीच्या अधिकाऱ्यांनी डिव्हाइस आणि कॅमेऱ्याचे मोबाइलमध्ये फोटो काढले आणि याबाबत बँकेलाही फोनवरून तसेच ई-मेलद्वारे माहिती दिली.
दुसऱ्या दिवशी कंपनीच्या इंजिनीअरने एटीएम मशीनला लावलेला स्क्रीमर आणि छुपा कॅमेरा काढत पोलिस ठाण्यात जमा केला. एटीएम कार्डधारकांचा डाटा चोरी करण्यासाठी हे डिव्हाइस लावले कोणी, याचा तपास ठाणे ग्रामीण पोलिस करत आहेत. कंपनीच्या अधिकाऱ्यांनी याबाबत दिलेल्या तक्रारीनंतर नयानगर पोलिस ठाण्यात अज्ञात व्यक्तीविरोधात गुन्हा दाखल करण्यात आला आहे.