संपूर्ण भारतात चंदेरीनगरी म्हणून प्रसिध्द असणाऱ्या हुपरी शहरात सध्या वेगळीच चर्चा रंगली आहे. येथील गायीच्या डोहाळे जेवणाची मोठी चर्चा आहे. हुपरी येथे राहणारे किसन माने या शेतकऱ्याने गायीवर असलेल्या प्रेमापोटी तिच्या डोहाळे जेवणाचा आणि ओटी भरण्याचा कार्यक्रम केला आहे.
गौरी असं या गायीचं नाव असून ती सध्या तीन वर्षांची आहे. तिच्या या डोहाळे जेवणाला आणि ओटी भरण्याच्या कार्यक्रमाला गावातील शेकडो महिला उपस्थित होत्या. या कार्यक्रमाची सध्या जोरात चर्चा सुरू आहे.
कोल्हापुरातील हुपरी या गावात राहणारे किसन माने हे शेतकरी असून त्यांची वडीलोपार्जित शेती आहे. त्यांना गो पालनाचीही आवड असल्याने ते गायीदेखील पाळतात. इतर गायी सोबतच त्यांच्याकडे गौरी नावाची गाय आहे. गौरी अगदी १५ दिवसाची असताना माने यांनी तिला घरात आणलं.
अगदी लहान बाळाप्रमाणे तिचं संगोपन केलं. गौरीला बाटलीमधून दुधही पाजलं. दिवसेंदिवस गौरीशी माने कुटुंबीयांची नाळ घट्ट होत गेली. आज ही गौरी गाय तीन वर्षांची झाली असून ती नऊ महिन्याची गर्भवती आहे. त्यामुळे माने यांनी अगदी आपल्या मुलीप्रमाणे असलेल्या गौरी गायीचं डोहाळे जेवण आणि ओटी भरण्याचा कार्यक्रम मोठा करण्याचं ठरवलं.
त्याप्रमाणे त्यांनी आपले मित्र, पै-पाहुणे आणि गल्लीतील अनेकांना आमंत्रण दिलं. गायीचं डोहाळे जेवण असल्याने उत्साहाने सर्वजण महिला जमल्या. महिलांनी गौरीचं औक्षण करत ओटीही भरली आणि आशिर्वादही घेतला. तिला यावेळी सुंदर सजवण्यात आलं होतं. दारात गायीची रांगोळीदेखील काढली होती. मोठ्या उत्साहात हा कार्यक्रम पार पडला.
माने कुटुंबियांनी या कार्यक्रमाला येणाऱ्या प्रत्येकासाठी स्नेह भोजनाचीही व्यवस्था केली होती. गायीची ओटी भरण्याच्या कार्यक्रमाला शेकडो महिला - पुरुष उपस्थित होते. अनेकजण या कार्यक्रमाचं आणि माने कुटुंबियांचं कौतुक करत होते. या कार्यक्रमाची चर्चा सध्या पंचक्रोशीत सुरू आहे.