म. टा. क्रीडा प्रतिनिधी, नागपूर
गोकुल स्पोर्टिंग क्लबच्या वतीने घेण्यात आलेल्या अनिल फुलसुंगे आंतरशालेय हॉकी स्पर्धेत १६ व १९ वर्षांखालील मुलांच्या गटात दीनानाथ हायस्कूल व कनिष्ठ महाविद्यालयाने, तर मुलींमध्ये ईरा इंटरनॅशनल स्कूलने बाजी मारली.
अमरावती मार्गावरील व्हीएचए मैदानावर रविवारी झालेल्या १६ वर्षांखालील मुलांच्या अंतिम सामन्यात दीनानाथ हायस्कूलने उत्कृष्ट खेळाचे प्रदर्शन करीत सेंट अॅन्थोनी स्कूलला ५-० अशा गोलफरकाने पराभूत केले. सामना सुरू होताच म्हणजे पहिल्या मिनिटाला प्रशांत मिश्राने गोल नोंदवत संघाला १-० अशी आघाडी मिळवून दिली. सेंट अॅन्थोनी स्कूलचे खेळाडू बरोबरी साधण्याचा प्रयत्न करीत असताना सचिन रावतने (२१), आयुष शुक्लाने (२२) आणि अभयनाथ चव्हाणने (२६ व २७) व्या मिनिटाला गोल करून नोंदवून संघाची आघाडी ५-० अशी भक्कम केली. सेंट अॅन्थोनी स्कूलच्या खेळाडूंनी अनेक आक्रमण केले. मात्र, सामना संपेपर्यंत कुणालाही गोल करण्यात यश आले नाही व दीनानाथ हायस्कूलने दिमाखदार विजय नोंदवला. १९ वर्षांखालील मुलांच्या गटातील अंतिम लढतीत दीनानाथ हायस्कूल व कनिष्ठ महाविद्यालयाने उत्कृष्ट खेळाच्या बळावर तिडके विद्यालयाला ३-० अशा गोलफरकाने पराभूत करीत बाजी मारली. दीनानाथच्या रौनक चौधरीने (२) आणि प्रफुल्ल बोरकरने (४) व्या मिनिटाला गोल नोंदवून सुरुवातीलाच संघाला २-० अशी आघाडी मिळवून देत वर्चस्व प्रस्थापित केले. तिडके विद्यालयाचे खेळाडू गोल करण्यासाठी झटले. पण, मध्यंतरापर्यंत कुणालाही गोल करण्यात यश आले नाही. मध्यंतरानंतर रौनक चौधरीने ४३ व्या मिनिटाला गोल करण्याची संधी गमावली नाही. सामना संपेपर्यंत तिडके विद्यालयाचे खेळाडू गोल करण्यात अपयशी ठरल्यामुळे त्यांना पराभवाचा सामना करावा लागला.
१९ वर्षांखालील मुलींच्या गटात हिमांशी गावंडे व पलक शर्माने केलेल्या प्रत्येकी दोन गोलच्या जोरावर इरा इंटरनॅशनल स्कूलने किड्स वर्ल्डला ६-० अशा गोलफरकाने पराभूत करीत विजेतेपद पटकाविले. सामन्यात इरा इंटरनॅशनल स्कूलच्या प्रेरणा बोडखेने (६), शौरी कुंभारेने (८), हिमांशी गावंडेने १० व ३५) आणि पलक शर्माने (४० व ६०) मिनिटाला गोल करण्याची कामगिरी केली.
.................