यजमानांची पिंक पँथर्सवर ४८-२४ अशी मात
म. टा. क्रीडा प्रतिनिधी, मुंबई
एक-दो, एक-दो रेडर को (चढाईपटूला) फेक दो… असा गजर करत यजमान यू मुम्बाच्या पाठिराख्यांनी एनएससीआय बंदीस्त संकुल डोक्यावर घेतले होते. प्रो कबड्डी लीगमधील यू मुम्बा विरुद्ध जयपूर पिंक पँथर्स या लढतीचे निमित्त होते. या पाठिराख्यांचा पुकारा यू मुम्बाने तंतोतंत पाळत जयूपरवर ४८-२४ असा सहज विजय मिळवत घरच्या मैदानावर दिवाळी साजरी केली. जयपूरसाठी हा सामना मात्र शिमग्यासारखा ठरला. मध्यंतरालाच यू मुम्बाकडे २६-८ अशी खणखणी आघाडी होती. त्यावरुनच जयपूरचा फडशा पडणार हे पक्के झाले होते. तो कितीच्या फरकाने एवढेच फक्त ठरायचे होते. वाढलेल्या वयामुळे हालचाली मंदावलेला अनुपकुमार, फॉर्म हरवलेला दीपक हुडा, पकडीतील 'पकड' च हरवून बसलेला मोहित चिल्लर अशा स्थिती असलेल्या जयपूरला नमवण्यासाठी खूप कष्ट पडणार नाहीत, याची आधीपासूनच कल्पना असल्याने यू मुम्बाने त्यांचा हुकमी चढाईपटू सिद्धार्थ देसाईला लढतीची अखेरची साडेतीन मिनिटे शिल्लक राहिल्यावर मैदानात उतरवले.
'यंदाच्या मोसमात आतापर्यंत तरी जयपूरला सूर गवसलेला नाही, हे ठाऊक असल्यानेच आम्ही सिद्धार्थला पुढील सामन्यांसाठी राखून ठेवायचे ठरवले. चढाईची जबाबदारी इतरांनी घेत त्याला विश्रांती दिली', अशी प्रतिक्रिया मुम्बाचा चढाईपटू अभिषेक सिंगने दिली. अभिषेकने सामन्यात सर्वाधिक १२ गुणांची कमाई केली. अभिषेकने १७ चढायांमध्ये १२, तर दोन यशस्वी पकडीदेखील केल्या. चढाईत फझल अत्राचलीने पाच, तर रोहित राणाने तीन गुण पटकावले. कर्णधार फझल तर जयपूरच्या चढाईपटूंना खांद्यावर घेत मॅटच्या बाहेर करत होता. त्याला रोहित राणाच्या अँकल होल्डची तोलामोलाची साथ लाभत होती. त्यात चढाईतील आघाडीचा अभिषेक हा पकडींमध्येही हुशारी दाखवत असल्याने उत्तरार्धात मुम्बाचा कर्णधार फझलने स्वतः बाहेर बसून बदली खेळाडू मॅटवर उतरवण्याचा निर्णय घेतला.
'असे खेळत राहिलो, तर पुढील वाटचाल अधिक कठीण होईल. आता एकत्र बसून गांभीर्याने अपयशाबाबत आत्मपरीक्षण व्हायला हवे, कारण शुक्रवारचा हा मुम्बाविरुद्धचा आमचा खेळ सुमारच होता', असे जयपूरचा कर्णधार अनुपकुमार म्हणाला. त्याने लढतीत १३ चढाया केल्या ज्यातील फक्त चार चढाया यशस्वी ठरल्या. दीपक हुडाचीही तीच गत. त्यामुळे जयपूरची अवस्था केविलवाणी झाली आहे.
या विजयासह यू मुम्बाने 'ए' झोनमध्ये ३९ गुणांसह अव्वल क्रमांकावर झेप घेतली आहे, तर याच गटात जयपूर संघ आठ झुंजीत १२ गुणांसह तळालाच आहे.
सिद्धार्थसाठी जल्लोष
या मोसमात आतापर्यंत यू मुम्बासाठी किफायतशीर ठरलेला चढाईपटू सिद्धार्थ देसाईला शुक्रवारी पहिल्या सातमध्ये खेळवण्यात आले नाही. तो मॅटवर आला तेच झुंज आटोपण्यास साडेतीन मिनिटे राहिली होती तेव्हा. प्रेक्षकांनी तेव्हाही त्याच्या नावाचा जल्लोष करत स्टेडियम डोक्यावर घेतले. पहिल्याच चढाईत त्याची पकड झाली.
तर सिद्धार्थ अव्वल असता
सिद्धार्थ देसाईला शुक्रवारच्या लढतीत चढाईपटूंच्या यादीत अव्वल होण्याची संधी होती. त्याच्या नावावर सध्या ७४ गुण आहेत, तर अव्वल असलेल्या नितीन तोमरच्या नावावर ८४ गुण आहेत. त्यासह अजय ठाकूर ८३, प्रदीप नरवाल ७६ हे चढाईपटू सिद्धार्थच्या पुढे आहेत. खांदे पाडलेल्या जयपूरविरुद्ध सिद्धार्थ हमखास खेळला असता. अर्थात मुम्बा व्यवस्थापनाने मोसमातील पुढील लढतींच्या हिशेबाने सिद्धार्थला विश्रांती दिली.