दृष्टिक्षेप
१)यंदाच्या अमेरिकन ओपन टेनिस स्पर्धेच्या फायनलमध्ये पंचांशी झालेल्या वादामुळे सेरेना विल्यम्सने मुख्य पंच कार्लोस रॅमोस यांच्याशी सामना आटोपल्यावर हस्तांदोलनच केले नाही.
२)'लिंगभेद' करत, केवळ आपण स्त्री असल्याने रॅमोस यांनी दंड ठोठावला, असा आरोप सेरेनाने केला. रॅमोसने आपली माफी मागावी, अशी मागणीही तिने केली होती.
३)अमेरिकन टेनिस असोसिएशनने सेरेनाला या वागणुकीसाठी १७ हजार डॉलर्सचा दंड ठोठावला आहे. तसेच आंतरराष्ट्रीय टेनिस फेडरेशननेही रॅमोस यांनाच पाठींबा देत, एकप्रकारे सेरेना चुकल्याचे दाखवून दिले आहे.
वृत्तसंस्था, लंडन
'व्यावसायिकता आणि प्रामाणिकपणा' यांचा मिलाफ साधून तुम्ही पंचगिरी केली, तुमचे कौतुकच व्हायला हवे... अशा शब्दात आंतरराष्ट्रीय टेनिस फेडरेशनने पंच कार्लोस रॅमोस यांचे कौतुक केले आहे. याच रॅमोस यांच्यावर सेरेनाने 'खोटारडेपणाचा अन् 'चोरी'चा (तिचा गुण काढून घेतल्याबद्दल) आरोप केला होता. गेल्या शनिवारी पार पडलेल्या अमेरिकन ओपन टेनिस स्पर्धेच्या फायनलमध्ये जपानच्या नाओमी ओसाकाने सेरेनावर ६-२, ६-४ अशा मात केली. त्या महिला एकेरीच्या फायनलदरम्यान सेरेनाने पंच रॅमोस यांच्याशी हुज्जत घालायला सुरुवात केली.
सेरेनाने तीनवेळा नियम भंग केला. सामना सुरू असताना तिने प्रशिक्षकांकडून मदत घेतली, तिने रागाच्या भरात रॅकेट तोडून टाकली आणि पंचांना अपशब्द वापरले. अशा तीन नियमांचा भंग केल्यानंतरच रॅमोस यांनी सेरेनाला दंड केला.
दुसऱ्यांदा आणि तिसऱ्यांना नियमभंग केल्यावर सेरेनाला आधी गुणाचा दंड झाला, तर नंतर तिला एका गेमचाच दंड करण्यात आला. यामुळे दुसऱ्या सेटमध्ये ओसाकाला ५-३ अशी आघाडी लाभली. यामुळे तिचा अमेरिकन जेतेपदाचा मार्ग खुला झाला. 'पंच रॅमोस हे लिंगभेद करतात. त्यांच्या निर्णयात स्त्री-पुरुष असमानता दिसते. त्यांनी माझे गुण हिरावून घेतले. त्यांनी माझी माफी मागावी. मी वागले तसे एखादा पुरुष टेनिसपटू वागला असता तर त्यांनी असा दंड केला नसता. मी हा भेदाभेद मिटवण्यासाठी लढते आहे', असे सेरेनाचे म्हणणे आहे. या अमेरिकन टेनिसपटूला डब्ल्यूटीएचे प्रमुख स्टीव्ह सिमॉन यांनी पाठिंबा दिला असून माजी महान टेनिसपटू बिली जीन किंग यादेखील सेरेनाशी सहमत आहेत.
मात्र आंतरराष्ट्रीय टेनिस फेडरेशनने (आयटीएफ) पंच कार्लोस रॅमोस यांना पाठिंबा दिला आहे. 'पंच रॅमोस हे आंतरराष्ट्रीय टेनिसमधील अनुभवी आणि आदरणीय व्यक्तीमत्व आहे. त्यांनी लावलेला दंड हा नियमांना धरूनच आहे. सेरेनाने जे तीन नियम मोडले त्याबद्दलच हा दंड आहे', असे आयटीएफचे म्हणणे आहे. आपल्या पत्रकात आयटीएफ असेही म्हणते की, 'या प्रकरणाला लिंगभेदाचे वळण देत उगीचच पराचा कावळा केला जातो आहे. हकनाक वाद उफाळून आला आहे'.
यांचा पंच रॅमोसना पाठिंबा...
माजी पंच रिचर्ड इंग्ज यांचे नाव दर्दी टेनिसप्रेमींना चांगलेच ठाऊक आङे. १९८७च्या अमेरिकन ओपनदम्यान त्यांनी अपशब्द वापरणाऱ्या जॉन मॅकेन्रोला दंड केला होता. त्यांनी असे मत व्यक्त केले की, 'रॅमोस गेली ४० वर्षे पंचगिरी करतो आहे. त्याने ती फायनल सुरेख हाताळलीच; पण झाल्याप्रकरणी त्याचे वर्तनही सभ्य माणसासारखेच होते. नियमांची पायामल्ली होत असल्याचे रॅमोसला दिसले आणि त्याने तो प्रकार थांबवला. माझा त्याला पूर्ण पाठिंबा आहे'.
सेरेना तू चूकलीसः नव्हरातिलोव्हा
एकेरीतील १८ ग्रँडस्लॅम जेतेपदांची मानकरी असलेली मार्टिना नव्हरातिलोव्हाच्या मते आकांडतांडव करणाऱ्या सेरेनाचे चुकले. ६१ वर्षांची नव्हरातिलोव्हा म्हणते, 'सेरेना वागली तसे टेनिस कोर्टवर कुणीच वागू नये. अर्थात तिने पंचावर केलेला आरोप गंभीर आहे, मग त्याची दखल घ्यावी. तपासणी करावी. आजही लिंगभेद होतो असे मला वाटते; पण मी असेही नमूद करेन की जे सेरेना वागली, तसे एखादा पुरुष टेनिसपटू वागला असता तर त्यालाही शिक्षा झाली असती. रॅमोसला जे दिसले त्यावरून त्याने पंच म्हणून सेरेनाला दंड केला, जे योग्यच होते. आपण खेळाडू म्हणून मैदानात कसे वागतो हे खूप महत्त्वाचे असते. प्रतिस्पर्धी, पंचांशी खिळाडूवृत्तीने वागणे ही खेळाडूची पहिली जबाबदारी आहे'.
व्यंगचित्रकारावर टीका
ऑस्ट्रेलियन दैनिक 'हेराल्ड सन'मध्ये प्रसिद्ध झालेल्या व्यंगचित्रामध्ये सेरेनावर टीका करण्यात आली आहे. हे व्यंगचित्र रेखाटणाऱ्या मार्क नाइटचा हॅरी पॉटरच्या लेखिका जे के रॉलिंग यांनी तिखट शब्दात समाचार घेतला. त्यांनी रेखाटलेल्या व्यंगचित्रात सेरेना रॅकेट तोडताना दाखवली असून तिची प्रतिस्पर्धी ओसाका पंच रॅमोसला विनंती करते आहे की, 'कृपया तिला जिंकायला द्याल का?'