- क्रिकेट स्पर्धा
म. टा. प्रतिनिधी, पुणे
स्वराज चव्हाणच्या तडाखेबंद अर्धशतकाच्या जोरावर पीवायसी हिंदू जिमखाना संघाने १६ वर्षांखालील गटाच्या कॅप्टन शिवरामपंत दामले करंडक क्रिकेट स्पर्धेत एच. के. बाउन्स संघावर ८ विकेटनी मात केली.
नाणेफेक जिंकून प्रथम फलंदाजी करताना बाउन्स संघाने निर्धारित २० षटकांत ५ बाद ११९ धावांपर्यंत मजल मारली. त्यात आदित्य एम. याने २९ चेंडूंत ५ चौकार आणि २ षटकारांसह ४१ धावांची खेळी केली.
प्रत्युत्तर देताना पीवायसीने स्वराज चव्हाण आणि समर्थ काळभोर यांच्या शतकी भागीदारीच्या जोरावर १५व्या षटकात दोन विकेटच्या मोबदल्यात विजयावर शिक्कामोर्तब केले. स्वराज-समर्थ यांनी दुसऱ्या विकेटसाठी ७३ चेंडूंत १०३ धावांची भागीदारी रचली. स्वराजने ५० चेंडूंत ११ चौकार आणि चार षटकारांसह नाबाद ७९ धावांची, तर समर्थने ३१ चेंडूंत पाच चौकारांसह २८ धावांची खेळी केली.
मृगांक, सर्वेशची अर्धशतके
दुसऱ्या लढतीत मृगांक रावळ आणि सर्वेश होले यांच्या तडाखेबंद अर्धशतकांच्या जोरावर आर्यन्स अॅकॅडमीने गायकवाड अॅकॅडमीवर १५० धावांनी विजय नोंदविला. प्रथम फलंदाजी करताना आर्यन्स अॅकॅडमीने निर्धारित २० षटकांत २ बाद २४५ धावांपर्यंत मजल मारली. त्यात मृगांक आणि सर्वेश यांनी तिसऱ्या विकेटसाठी ६६ चेंडूंत ११२ धावांची भागीदारी रचली. प्रत्युत्तर देताना गायकवाड अॅकॅडमीला ९५ धावांपर्यंतच मजल मारता आली.
शिल्पेशचे ५ बळी
शिल्पेश गावडे आणि करण इंगोले यांच्या अचूक गोलंदाजीच्या जोरावर कोद्रे इलेव्हनने मिलेनियम संघावर ५२ धावांनी मात केली, तर क्रिकेट नेक्स्ट अॅकॅडमीने (सीएनए) सिटी इंटरनॅशनल स्कूलवर सहा विकेटनी विजय नोंदविला.
संक्षिप्त धावफलक : एच. के. बाउन्स - २० षटकांत ५ बाद ११९ (आदित्य एम. ४१, जीवन पंचमुख २६, सोहम शिंदे ३-२५) पराभूत वि. पीवायसी - १४.१ षटकांत २ बाद १२३ (स्वराज चव्हाण नाबाद ७९, समर्थ काळभोर २८); आर्यन्स अॅकॅडमी - २० षटकांत २ बाद २४५ (मृगांक रावळ नाबाद ६१, सर्वेश होले नाबाद ५९, नित्य शहा ४७, साहिल कड ३८) वि.वि. गायकवाड अॅकॅडमी - ९ बाद ९५ (सोहम शेलार ३७, रोहन पुणेकर २-२०, श्रेयस अगरवाल २-९); कोद्रे इलेव्हन - १९.५ षटकांत सर्वबाद ११४ (प्रज्वल कापडे ४२, वेदांत डी. ३०, प्रसाद लोखरे ३-१४, दीप फुलफगार २-१५, सोहम गारगोटे २-३२) वि. वि. मिलेनियम - १३ षटकांत सर्वबाद ६२ (प्रद्युम्न कऱ्हाडे नाबाद १४, शिल्पेश गावडे ५-१६, करण इंगोले ३-११); सिटी इंटरनॅशनल स्कूल - १८.२ षटकांत सर्वबाद ८० (आदित्य इंगळे २२, सोहम धुमाळ ३-१७, वरुण झंवर ३-२१, सोहम पागडे २-२) पराभूत वि. क्रिकेट नेक्स्ट अॅकॅडमी - ११.२ षटकांत ४ बाद ८३ (निमिर जोशी नाबाद २५, मनीष एस. २४, आर्यन कुरूळकर २-१५).