मकर संक्रांतीला पाहुण्यांचं लक्ष वेधून घेतील 'या' रांगोळ्या

मुंबई: सण उत्सव म्हटलं की घर सजवण आलं. घर सजवताना घरा बाहेरील अंगण सुंदर दिसण्यासाठी सुंदर रांगोळी तर हवीच. रांगोळी म्हणजे ६४ कलाप्रकारांपैकी एक! रांगोळी ही प्रामुख्याने सण, उपवास, उत्सव, लग्न इ. शुभप्रसंगी काढली जाते .रांगोळी हे एक मांगल्याचं आणि उत्साहाचं प्रतीक मानलं जातं. प्रत्येक राज्यात या रांगोळीला विविध नावांनी संबोधलं जातं. कर्नाटकात रंगवली, उत्तरांचल प्रदेशात ऐपन, आंध्रप्रदेशात मुग्गु आणि केरळमध्ये कोल्लम. रांगोळीची परंपरा ही अगदी प्राचीन काळापासून चालत आलेली आहे. सध्या मकर संक्रातीच्या सणाचा उत्सव असून या सणाला तुम्ही देखील छान आणि सुंदर रांगोळ्या काढून पाहुण्यांचं स्वागत करू शकता.

वाचा: मकरसंक्रांतीचं महत्त्व आणि मुहूर्त

रांगोळी साकारण्याची पद्धत:
जमीन सारवून त्यावर विविध रंग, तांदूळ, धान्य, पालापाचोळा, रंगबेरंगी फुलं, आणि इ. नैसर्गिक पदार्थ वापरुन ही रांगोळी साकारली जायची. भौमितिक आकार, स्वस्तिक, देवांच्या प्रतिकृती, देखावे अशा विविध संकल्पनांनी ही रांगोळी नटवली जाते. पण काळानुसार रांगोळी साकारण्याची पद्धत ही बदलत गेली. रांगोळी देखील ट्रेंडीग झाली आहे.


साचेबद्धपणाच्या पलीकडे:
हल्लीच्या धावपळीच्या जीवनात रांगोळी काढण्यासाठी कोणाकडे तितकीशी सहनशीलता उरलेली नाही. त्यामुळे कित्येक पर्याय अवलंबले जातात. जसं की स्टिकर्स रांगोळी, एकदा स्टीकर लावलं की रांगोळीची सोय झाली. त्यानंतर साच्यातील रांगोळी, रंग टाकले आणि सुबक रांगोळी तयार. तरीही सध्या रांगोळीमध्ये विविधता आणण्यासाठी आपली तरुण पिढी पुरेपूर प्रयत्न करत आहे. त्यामुळेच हल्लीच्या रांगोळीमध्ये साचेबद्धपणाच्या पलीकडे क्रिएटीव्हीटी आणि विविधताही दिसून येते. फुलांची रांगोळी, कडधान्याची रांगोळी आणि तांदळाच्या दाण्यांना रंग देऊन तयार केलेली रांगोळी.

पाहा:संक्रातीसाठी सुडके, बोळके, सुगड बनवण्याची लगबग
हळदी-कुंकू समारंभासाठी:
रांगोळी काढण्यासाठी एकाग्रता आणि मेहनत लागते आणि एकदा पूर्ण झाल्यावर मात्र अतिशय सुंदर दिसते. पाण्यावरील आणि तेलावरील रांगोळी हल्ली खूप हिट आहे. ही पद्धत वेगळी असल्यामुळे पाहुण्यांचं विशेष लक्ष वेधून घेते. अशी ही रांगोळीसारखी रंगबेरंगी कलाकृती पाहण्यास सगळ्यांना नेहमीच आनंद वाटतो