ज्योतिषशास्त्रातील अनेक महत्त्वाच्या शाखांपैंकी एक म्हणजे न्यूमरोलॉजी. भविष्यकथनामध्ये कुंडली, हस्तरेषा, चेहरा, नाडीपरीक्षा यांच्या इतकेच महत्त्व संख्याशास्त्राच्या माध्यमातून सांगितल्या जाणाऱ्या भविष्यालाही आहे. मूलांक म्हणजे एखादी व्यक्ती महिन्याच्या ज्या तारखेस जन्मली तिच्यापासून मिळणारा अंक. न्युमरोलॉजी म्हणजे अंकशास्त्र किंवा आकडेशास्त्र. आकड्यांमध्येही ऊर्जा असते आणि तिचा परिणाम माणसांवर होत असतो. वार्षिक दिनदर्शिकेत नोव्हेंबर हा अकरावा महिना येतो. मूलांक दोनचा संचालक चंद्र ग्रह मानला जातो. नोव्हेंबर महिना कोणत्या मूलाकांच्या व्यक्तींना लाभदायक ठरेल? कोणत्या मूलांकांच्या व्यक्तींनी नेमकी काय काळजी घेणे अपेक्षित आहे? याचा अंक ज्योतिषी पिनाकी मिश्रा यांनी घेतलेला हा आढावा...
मूलांक १ : नोकरदार वर्गाला दिलासादायक
ज्या व्यक्तींचा जन्म १, १०, १९, किंवा २८ या तारखांना झाला असेल, तर त्यांचा मूलांक एक असतो. सूर्य या मूलांकाचा संचालक मानला जातो. नोव्हेंबर महिन्याचे प्रतिनिधित्व चंद्र करत आहे. सूर्य आणि चंद्र या दोन्ही ग्रहांचा प्रभाव आगामी महिन्यात आपल्यावर राहील. आगामी महिन्यात बहुतांश वेळा द्विधा मनःस्थितीला सामोरे जावे लागू शकेल. एखाद्या मोठ्या, महत्त्वाकांक्षी कामावर भर देण्याची प्रेरणा मिळत राहील. नोकरदार वर्गाला आगामी महिना दिलासादायक ठरू शकेल. स्थान परिवर्तन, पदोन्नतीचे योग जुळून येऊ शकतील. जोडीदाराशी मतभेद होण्याची शक्यता असून, दाम्पत्य जीवनात संयमाने आणि धैर्याने परिस्थिती हाताळणे हिताचे ठरेल. तसेच प्रत्येक रविवारी आदित्य हृदयस्तोत्राचे पठण करणे उपयुक्त ठरेल, असे सांगितले जात आहे.
मूलांक २ : आर्थिक आघाडीवर फायदेशीर कालावधी
ज्या व्यक्तींचा जन्म २, ११, २० किंवा २९ तारखेला झाला असेल, तर त्यांचा मूलांक दोन असतो. चंद्र हा मूलांक दोनचा संचालक मानला गेला आहे. नोव्हेंबर महिन्याचा संचालकही चंद्र असल्याने आगामी महिना आपल्यासाठी फायदेशीर ठरेल, असे सांगितले जात आहे. मिळालेल्या संधीचे सोने करणे लाभदायक ठरेल. स्पर्धा परीक्षांची तयारी करत असलेल्या विद्यार्थ्यांना महिन्याच्या अखेरीपर्यंत अपेक्षित सकारात्मक परिणाम प्राप्त होऊ शकतील. वैवाहिक जीवनात जुने मतभेद संपून नातेसंबंध दृढ होतील. नोव्हेंबर महिन्यातील दुसऱ्या आणि चौथ्या आठवड्यात आरोग्याची विशेष काळजी घ्यावी. मित्रांचे उत्तम सहकार्य लाभेल. त्याचा सल्ला मोलाचा ठरू शकेल. आर्थिक आघाडीवर काही फायदे होतील. शक्य असल्यास पौर्णिमेला सत्यनारायण कथा पठण करावी, असे सांगितले जात आहे.
मूलांक ३ : मनातील इच्छा पूर्ण होतील
ज्या व्यक्तींचा जन्म ३, १२, २१ किंवा ३० या तारखेला झाला असेल, तर त्याचा मूलांक तीन असतो. गुरु हा मूलांक तीनचा संचालक मानला गेला आहे. या आगामी महिन्यात आपल्यावर प्रामुख्याने गुरु आणि चंद्र या दोन ग्रहांचा प्रभाव राहील. आगामी कालावधीत तार्किक क्षमता वाढीस लागेल. मानसिक शांतता आणि प्रसन्नता लाभेल. मनोकामना पूर्ण होतील. मात्र, कफकारक आजार त्रस्त करण्याची शक्यता असल्यामुळे आरोग्याची विशेष काळजी घ्यावी. जोडीदाराशी मतभेद होऊ शकतात. मात्र, याचा परिणाम कुटुंबावर होऊ देऊ नये. वादाचे प्रसंग प्रकर्षाने टाळावेत. संगीत, कला, साहित्य क्षेत्रातील व्यक्तींना उत्तमोत्तम संधी प्राप्त होऊ शकतील. मिळकतीचे नवीन स्रोत सापडतील. शक्य असल्यास प्रत्येक गुरुवारी विष्णू सहस्रनामाचे पठण करावे, असे सांगितले जात आहे.
नोव्हेंबरमध्ये ५ ग्रहांचा चलनबदल; कसा असेल प्रभाव, कोणाला लाभ? वाचा
मूलांक ४ : मान, सन्मान वृद्धिंगत होतील
ज्या व्यक्तींचा जन्म ४, १३, २२ किंवा ३१ यापैकी तारखेला झाला असेल, तर त्यांचा मूलांक चार असतो. राहु या मूलांकाचा संचालक मानला गेला आहे. नोव्हेंबर महिन्यात आपल्यावर राहु आणि चंद्राचा प्रामुख्याने प्रभाव पडेल. आगामी कालावधीत सुख, सुविधा, मान, सन्मान वृद्धिंगत होतील. कौटुंबिक वातावरण आनंदी आणि उत्साही राहील. कार्यक्षेत्रातील वरिष्ठ अधिकाऱ्यांकडून प्रसंशा, कौतुक होईल. विद्यार्थ्यांना सकारात्मक निकाल मिळू शकतील. प्रसिद्ध व्यक्तींशी झालेल्या भेटामुळे जनसंपर्कात भर पडू शकेल. निराशा, नकारात्मकता टाळावी. प्रयत्न वाढवणे हिताचे ठरेल. प्रेमात असलेल्या व्यक्तींना सुरुवातीचा पंधरवडा उत्तम असेल. चर्चेच्या माध्यमातून मतभेद दूर करण्यावर भर द्यावा. शक्य असल्यास संपूर्ण महिनाभर गायत्री मंत्राचा मानसिक जप करावा, असे सांगितले जात आहे.
मूलांक ५ : उत्तम लाभदायक महिना
ज्या व्यक्तींचा जन्म ५, १४, किंवा २३ यापैकी एखाद्या तारखेला झाला असेल, तर त्या व्यक्तीचा मूलांक पाच असतो. बुध ग्रहाला मूलांक पाचचे संचालक मानण्यात आले आहे. आगामी नोव्हेंबर महिन्यात आपल्यावर बुध आणि चंद्र ग्रहाचा प्रामुख्याने प्रभाव राहील. अनेक कामे एकदम हातात घेतल्यामुळे द्विधा मनःस्थिती निर्माण होऊ शकते. यामुळे कोणतेही काम पूर्णपणे यशस्वीरित्या पार पडेल, असे नाही. एक ना धड भाराभर चिंध्या, अशी परिस्थिती निर्माण होऊ शकेल. त्यामुळे नियोजन, कौशल्य, व्यवस्थापन आणि एकाग्र चित्ताने हाती घेतलेली कामे पार पडणे हिताचे ठरेल. वस्त्रोद्योग आणि फर्निचर व्यापाराशी संबंधित व्यक्तींना आगामी महिना उत्तम लाभदायक ठरू शकेल. वैवाहिक जीवनातील मतभेदाचा परिणाम कार्यक्षमतेवर होऊ देऊ नये. गुडघेदुखीचा त्रास संभवतो. आरोग्याची विशेष काळजी घ्यावी. पथ्यपाणी, औषधे चुकवू नयेत, असे सांगितले जात आहे.
मूलांक ६ : प्रगतीचे मार्ग प्रशस्त होतील
ज्या व्यक्तींचा जन्म ६, १५ किंवा २४ यापैकी तारखेला झाला असेल, तर अशा व्यक्तींचा मूलांक सहा असतो. शुक्र ग्रहाला मूलांक सहाचे संचालक मानले गेले आहे. नोव्हेंबर महिन्यात आपल्यावर शुक्र आणि चंद्र या दोन ग्रहांचा प्रामुख्याने प्रभाव राहील. या महिन्याच्या मध्यावर कार्यक्षेत्रात एखादे मोठे यश मिळून प्रगतीचे मार्ग प्रशस्त होऊ शकतील. मान, सन्मान, प्रतिष्ठा लाभेल. ती वृद्धिंगत होत राहील. कुटुंबातील सदस्यांचे उत्तम सहकार्य लाभेल. त्यामुळे आपल्याला प्रोत्साहन मिळत राहील. ऊर्जा आणि सकारात्मकता संचारेल. उत्साहाने कार्यरत राहिल्यामुळे कार्यक्षमता वाढीस लागेल. अनोळखी व्यक्तींचे सहकार्य मोलाचे ठरू शकेल. प्रलंबित कामे मार्गी लागतील. नोकरदार वर्गाला पदोन्नतीचे योग आहेत. कार्यालयात अधिकारी वर्गाकडून प्रशंसा, कौतुक होऊ शकेल. मनोबल उंचावले. महिन्याच्या उत्तरार्धात पोटाचे विकार संभवतात. प्रकृती जपा. शक्य असल्यास शनिवारी काली मातेच्या मंदिरात जाऊन श्रीफळ अर्पण करावे, असे सांगितले जात आहे.
मूलांक ७ : विरोधकांपासून सावध राहावे
ज्या व्यक्तींचा जन्म ७, १६ किंवा २५ यापैकी एका तारखेला झाला असेल, तर अशा व्यक्तींचा मूलांक सात असतो. केतु ग्रह मूलांक सातचा संचालक मानला गेला आहे. नोव्हेंबर महिन्यात आपल्यावर केतु आणि चंद्र या दोन ग्रहांचा प्रामुख्याने प्रभाव राहील. या महिन्याच्या मध्यावर मान विचलित होऊ शकते. विरोधकांच्या कारवायांकडे दुर्लक्ष करू नये. अखंड सावध राहून कार्यरत राहावे. हितशत्रूंची षडयंत्रे आपली प्रतिमा मलीन करण्याचा प्रयत्न करू शकतील. मात्र, आपण यातून सही-सलामत बाहेर पडू शकाल. वैवाहिक जीवनातील छोट्या छोट्या कुरबुरींमुळे मन खिन्न होऊ शकेल. विद्यार्थ्यांसाठी हा महिना उत्तम असेल. सांधेदुखीचा त्रास बळावू शकतो. ध्यानधारणा आणि प्राणायाम यांमुळे मानसिक शांतता लाभू शकेल, असे सांगितले जात आहे.
वाचा : नोव्हेंबर महिन्याचे आर्थिक राशीभविष्य
मूलांक ८ : मित्रांचे सहकार्य मोलाचे ठरेल
ज्या व्यक्तींचा जन्म ८, १७ किंवा २६ यापैकी एका तारखेला झाला असेल, तर त्या व्यक्तींचा मूलांक आठ असतो. शनी ग्रह मूलांक आठचा संचालक मानला गेला आहे. नोव्हेंबर महिन्यात आपल्यावर शनी आणि चंद्र या दोन ग्रहाचा प्रामुख्याने प्रभाव राहील. नको त्या प्रलोभनांना बळी पडू नये. त्यामुळे आर्थिक नुकसान होण्यापासून बचाव होईल. या महिना काही प्रमाणात अनुभवाचा ठरू शकेल. युवावर्गात ऊर्जा आणि उत्साह संचारेल. मित्रांचे सहकार्य मोलाचे ठरेल. महिला वर्गाला मानसिक विचलन, द्विधा मनःस्थितीला सामोरे जावे लागू शकेल. लव लाइफमध्ये बाहेरच्या व्यक्तीचा हस्तक्षेप होऊ देऊ नये. मतभेद, समस्या चर्चेने आणि सामंजस्याने सोडवाव्यात. शक्य असल्यास दररोज देवीसूक्ताचे पठण करणे उपयुक्त ठरेल, असे सांगितले जात आहे.
मूलांक ९ : सारासार विचार करून निर्णय घ्यावा
ज्या व्यक्तींचा जन्म ९, १८ किंवा २७ यापैकी तारखेला झाला असेल, तर त्या व्यक्तींचा मूलांक नऊ असतो. मंगळ ग्रह मूलांक नऊचा संचालक मानला गेला आहे. त्यामुळे या महिन्यात आपल्यावर मंगळ आणि चंद्र या दोन ग्रहांचा प्रामुख्याने प्रभाव राहील. या महिनाभरात भावनात्मक निर्णय घेऊ नयेत. सारासार विचार करून मगच निर्णय घेणे हिताचे ठरेल. नवीन कार्यारंभासाठी सध्याचा काळ अनुकूल नाही. वैवाहिक जीवनात छोट्या छोट्या कुरबुरींमुळे मन खिन्न होऊ शकते. सांधेदुखीचा त्रास संभवतो. आरोग्याची विशेष काळजी घ्यावी. पथ्यपाणी, औषधे चुकवू नयेत. शक्य असल्यास प्रत्येक शनिवारी शनी मंदिरात जाऊन दिवा लावावा लाभदायक ठरेल, असे सांगितले जात आहे.