श्री महामरियम्मन मंदिर
भारतात जशी लाखों मंदिर आहेत, कोट्यवधी भाविक आहेत, तसेच बँकॉक शहरातही काही पूरातन आणि प्रसिद्ध मंदिरे आहेत. श्री महामरियम्मन हे त्यातीलच एक हिंदू मंदिर आहे. सुमारे १५० वर्षांपूर्वी हे मंदिर बांधण्यात आले होते. हे मंदिर उमा देवीच्या नावानेही ओळखले जाते. हे मंदिर मरियम्मन देवीला समर्पित करण्यात आले आहे. मरियम्मा देवीला पार्वती आणि दुर्गेचे एक रुप मानले जाते. या मंदिरात गणपती आणि कार्तिकेय यांचीही छोटेखानी मंदिरे आहेत. सिलोम भागात हे मंदिर आहे.
एरावन मंदिर
बँकॉकमधील हे प्रसिद्ध देवस्थान असून, या मंदिरात ब्रह्म देवाची मूर्ती स्थापन करण्यात आली असून, ही मूर्ती संपूर्ण सोन्याची आहे. हे मंदिर १९५६ मध्ये बांधण्यात आले आहे. ग्रँड हयात एरावन हॉटेलचे बांधकाम सुरू होते. बांधकामात अनेक अडचणी येत होत्या. ज्योतिषांनी ब्रह्म देवाच्या मूर्तीची प्रतिष्ठापना करण्याचा सल्ला दिला. त्यामुळे प्रथम मंदिराचे बांधकाम करण्यात आले. मंदिर उभारणीनंतर कोणताच अडथळा न येता हॉटेलचे बांधकाम पूर्ण झाले.
इंद्रदेव मंदिर
बँकॉकमधील इंटरकॉन्टिनेन्टल हॉटेलासमोर इंद्र देवाचे मंदिर आहे. हे मंदिर अमरिंदर अधिराज या नावानेही ओळखले जाते. या मंदिरातील इंद्र देवाची मूर्ती हिरव्या रंगाची आहे असून, हातात वज्र आहे. या मंदिरात इंद्राचे वाहन ऐरावतही आहे. हिंदू भाविकांसह अन्य धर्मीय स्थानिक भाविकही या मंदिरात दर्शनाला जातात.
नारायण मंदिर
इंटरकॉन्टिनेन्टल हॉटेलाजवळच भगवान विष्णू आणि त्यांचे वाहन गरुडाची मूर्ती असलेले मंदिर आहे. या मंदिराचे बांधकाम १९९७ मध्ये करण्यात आले. स्थानिकांचे रक्षण देव नारायण करतात, अशी मान्यता परिसरात आहे. या मंदिरात केवळ पिवळ्या रंगाची फुले अर्पण केली जातात.
महालक्ष्मी मंदिर
इंटरकॉन्टिनेन्टल हॉटेलाशेजारी असलेल्या नारायणाच्या मंदिरात महालक्ष्मीची मूर्तीदेखील स्थापन करण्यात आली आहे. स्थानिकांना धनलाभ आणि भाग्योदय या देवीमुळे होते, अशी श्रद्धा आहे. समृद्धीचे प्रतिक असणारे गुलाबी कमळ, नाणी, उसाचा रस आदी गोष्टी मंदिरात अर्पण केल्या जातात.
गणेश मंदिर
शंकर आणि पार्वती पुत्र गणेशाचे मंदिरही या भागात आहे. या मंदिरातील गणेशाची मूर्ती सोन्याची आहे. हे मंदिर विद्यार्थी आणि प्राध्यापकांमध्ये प्रसिद्ध आहे. ज्ञान आणि भाग्योदयासाठी या मंदिरात प्रार्थना केली जाते.
त्रिमूर्ती मंदिर
गणेश मंदिराशेजारी त्रिमूर्तींचे मंदिर आहे. सेंट्रल वर्ल्ड बँकॉकसमोर हे मंदिर बांधण्यात आले आहे. प्रेमाच्या देवतेचे मंदिर म्हणून स्थानिक तरुणांमध्ये हे मंदिर प्रसिद्ध आहे. लाल गुलाब, लाल मेणबत्ती, लाल फळ, लाल अरबत्ती अशा गोष्टी तेथे अर्पण केल्या जातात.