Blue Moon On Sharad Purnima 2020 शरद पौर्णिमेला 'ब्ल्यू मून'चे दर्शन; पुढील संधी १९ वर्षांनी मिळणार!

सन २०२० अनेक घटनांचे साक्षीदार होत आहे. चातुर्मासातील अश्विन पौर्णिमेला अनन्य साधारण महत्त्व आहे. याला शरद पौर्णिमा, कोजागरी पौर्णिमा, नवान्न पौर्णिमा अशा अनेकविध नावांनी संबोधले जाते. या प्रत्येक नावाचे महत्त्व वेगवेगळे आहे. हा एक कृषी उत्सव म्हणूनही साजरा केला जातो. यंदाच्या वर्षी शरद पौर्णिमेला ब्ल्यू मून दर्शन होणार असल्याचे सांगितले जाते. मात्र, ही संधी हुकल्यास तब्बल १९ वर्षे वाट पाहावी लागेल, असे सांगितले जात आहे. जाणून घेऊया...

शरद पौर्णिमेला जुळून येताहेत अद्भूत महायोग; 'या' मुहूर्तावर करा लक्ष्मी पूजन

ब्लू मूनचा दुर्लभ योग

'नेहरू तारांगण'चे संचालक अरविंद परांजपे यांनी दिलेल्या माहितीनुसार, शुक्रवार, ३० ऑक्टोबर २०२० रोजी सायंकाळी ०५ वाजून ४५ मिनिटांपासून ते शनिवार, ३१ ऑक्टोबर २०२० रोजी रात्री ०८ वाजून १८ मिनिटांपर्यंत ब्ल्यू मून पाहता येऊ शकेल. यंदाच्या शरद पौर्णिमेला ब्लू मूनचा दुर्लभ योग जुळून येत असून, ही संधी हुकल्यास तब्बल १९ वर्षे वाट पाहावी लागणार आहे. पुढील संधी सन २०३९ मध्ये मिळेल. यापूर्वी १८८३ मध्ये शरद पौर्णिमेच्या दिवशी ब्ल्यू मून पाहण्याची संधी प्राप्त होती.

शरद पौर्णिमा : राशींनुसार लक्ष्मी देवीला दाखवा नैवेद्य; म्हणा 'हे' मंत्र

ब्ल्यू मून म्हणजे काय?

ब्ल्यू मून ही पाश्चिमात्य संकल्पना असून, तिचा उगम सतराव्या शतकात सापडतो. युरोपमध्ये वसंत, उन्हाळा, शरद आणि हिवाळा असे चार ऋतू असतात. साधारणपणे १२ महिन्यांमधील या चार ऋतूंमध्ये प्रत्येकी तीन पौर्णिमा येतात. मात्र, काही वेळा एका ऋतूत चार पौर्णिमा येतात. अशा वेळी त्या ऋतुमधील तिसऱ्या पौर्णिमेच्या चंद्राला 'ब्ल्यू मून' म्हटले जाते. विसाव्या शतकाच्या मध्यापासून एका महिन्यात दोन पौर्णिमा आल्यास त्यांपैकी दुसऱ्या पौर्णिमेच्या चंद्राला 'ब्ल्यू मून' म्हणून संबोधले जाऊ लागले; खगोलशास्त्रीयदृष्ट्या त्याच्या गुणधर्मांमध्ये कोणताही फरक पडत नाही, असे अरविंद परांजपे यांनी सांगितले.

कोजागरी पौर्णिमा : महालक्ष्मी देवीचे पूजन; धनलाभाचे शुभ योग

कोजागरी पौर्णिमेला अद्भूत महायोग

पंचांगानुसार, यंदाच्या शरद पौर्णिमेला अनेक शुभ योग जुळून येत आहेत. कोजागरी पौर्णिमा शुक्रवारी येत आहे. शुक्रवारी लक्ष्मी देवीचे पूजन करणे शुभ मानले जाते. त्यामुळे हा योग विशेष मानला जात आहे. शरद पौर्णिमेला सर्वार्थ सिद्धि नामक शुभ योग जुळून येत आहे. कोजागरी पौर्णिमेच्या दिवशी सूर्योदयापासून ते दुपारी ०२ वाजून ५७ मिनिटांपर्यंत अमृत सिद्धि योग आणि रवि योग जुळून येत आहेत. हे दोन्ही योग शुभ मानले जातात. तसेच सायंकाळी ०५ वाजून ४५ मिनिटांनी पंचक समाप्ती होत आहे.