ऐकावं ते नवलच! बेडकाचे मंदिर माहिती आहे का?

उत्तर प्रदेशातील लखीमपूर जिल्ह्यात बेडकाचे मंदिर उभारण्यात आले आहे. हे मंदिर २०० वर्ष जुने आहे. लखीमपूर जिल्ह्यातील ओयल भागात दुष्काळ आणि महापूर या नैसर्गिक आपत्तीपासून बचाव व्हावा, यासाठी हे बेडकाचे मंदिर उभारण्यात आले. या मंदिरातील शिवलिंगाची गोष्टही अगदी निराळी आहे. या मंदिरातील शिवलिंगाचा रंग बदलत असतो. या मंदिरासमोर नंदीची उभी मूर्ती आहे. भारतभरातील अन्य सर्व मंदिरांमध्ये शिवलिंगासमोरील नंदी बसलेल्या स्थितीत आढळतो.

या मंदिराच्या भींतींवर तांत्रिक देवी-देवतांच्या मूर्ती आहेत. त्याचप्रमाणे मंदिरात विचित्र प्रकारची अनेक चित्रे पाहायला मिळतात. चित्र विचित्र असली, तरी यामुळे मंदिराला एक आकर्षक स्वरूप येते. मंदिर परिसरात बेडकाची मूर्ती आहे.

या मंदिराचे बांधकाम तंत्रवादावर आधारित आहे. तंत्र-मंत्र करताना जशी रचना केली जाते, तसे याचे स्वरूप आहे. या रचनेमुळे हे मंदिर अद्भूत दिसते आणि येथे आलेला प्रत्येक जण या मंदिराची संरचना पाहून मंत्रमुग्ध होतो.

जुन्या ऐतिहासिक कथेनुसार, ओयल शैव साम्राज्यात हे मंदिर बांधले गेले आणि हे मंदिर ओयल साम्राजाचे केंद्र होते. ओयल शासकांनी हे मंदिर उभारले. हे भगवान शंकराचे स्थान असल्यामुळे या मंदिराला नर्मदेश्वर मंदिर म्हणूनही ओळखले जाते.

बेडकाच्या मंदिरात दररोज हजारो भक्त दर्शनासाठी हजेरी लावतात. दिवाळी आणि महाशिवरात्रीनिमित्त येथे विशेष पूजाविधीचे आयोजन करण्यात येते. या मंदिरात पूजा केल्याने मनातील सर्व इच्छा पूर्ण होतात, अशी मान्यता आहे.