दुचाकींवर ₹ १२,५००ची बंपर सूट

मटा ऑनलाइन वृत्त । नवी दिल्ली

देशातील प्रदूषण आणि नागरिकांच्या आरोग्याची गंभीर दखल घेत सुप्रीम कोर्टाने 'बीएस- ३' इंजिन असणाऱ्या वाहनांची खरेदी-विक्री आणि नोंदणीवर १ एप्रिलपासून बंदी घालण्याचे आदेश दिल्यानंतर 'स्टॉक'मध्ये असलेल्या गाड्यांच्या विक्रीसाठी कंपन्यांची धावाधाव सुरू झाली आहे. त्यातूनच दुचाकी उत्पादनातील आघाडीच्या हिरो मोटोकॉर्प आणि होंडा मोटरसायकल अॅण्ड स्कूटर इंडिया या कंपन्यांनी बीएस-३ इंजिन असलेल्या दुचाकींवर बंपर डिस्काउंट ऑफर जाहीर केली आहे. 'स्टॉक' संपेपर्यंत किंवा उद्या म्हणजेच ३१ मार्चपर्यंतच्या बुकिंगवरच ही ऑफर असणार आहे.

बीएस-३ इंजिन असलेली सुमारे ८ लाख वाहनं आजघडीला 'स्टॉक'मध्ये आहेत. यात तब्बल ६.७१ लाख दुचाकी आहेत. सुप्रीम कोर्टाच्या आदेशामुळे ही वाहनं अवघ्या दोन दिवसांत विकण्याचे आव्हान कंपन्यांपुढे उभे ठाकले आहे. त्यातून हिरो मोटोकॉर्पने बीएस-३ इंजिन असलेल्या दुचाकींवर जास्तीत जास्त १२ हजार ५०० रुपयांपर्यंतची सूट जाहीर केली आहे. विक्रेत्यांनी दिलेल्या माहितीनुसार, स्कूटरवर १२ हजार ५००, प्रिमीयम बाइक्सवर ७ हजार ५०० तर अन्य मोटरसायकल्सवर ५ हजार रुपयांची सूट दिली जाणार आहे.

होंडा मोटरसायकल आणि स्कूटर इंडियाने स्कूटर आणि मोटरसायकलवर १० हजार रुपयांची सरळ सूट देण्याची घोषणा केली आहे. ऑटोमोबाइल डीलर संघटनेचे संचालक निकुंज संघी यांच्या मते, दुचाकींवर इतकी मोठी सूट याआधी कधीही जाहीर झालेली नाही.

‘बीएस’ मानके म्हणजे काय?

- ‘बीएस’ म्हणजे ‘भारत स्टँडर्ड स्टेज’. इंजिनाच्या अंतर्गत वहनामुळे होणाऱ्या प्रदूषणाच्या नियमनासाठी, केंद्र सरकारने दिलेले मानक म्हणजे ‘बीएस’ होय. केंद्रीय प्रदूषण नियंत्रण मंडळ त्यावर नियंत्रण ठेवते.

- बीएस मानके ही भारतात धावणाऱ्या सर्व वाहनांसाठी लागू आहेत.

- भारतात जशी बीएस मानके आहेत, तशी युरापोत Euro, अमेरिकेत Tier 1, Tier 2 अशी मानके आहेत.

- वाहनाच्या इंजिनामुळे होणाऱ्या प्रदूषणावर नियंत्रण ठेवण्यासाठी बीएस मानांकनात वेळोवेळी सुधारणा होत असते. ‘बीएस ४’ हा त्याचाच भाग असून, कमीत कमी वायू प्रदूषणाच्या दृष्टीने आता भारतात वाहनांमध्ये ‘बीएस ४’ इंजिन बंधनकारक आहे.