होंडाने आणली 'आम आदमी'ची शानदार बाइक

मटा ऑनलाइन वृत्त। नवी दिल्ली

होंडाने आपली बजेट बाइक 'ड्रीम डीएक्स', बीएस-४ मध्ये सुधारणा करून 'CD 110 Dream DX' या नावाने बाजारात आणली आहे. या बाइकची एक्स शोरूम किंमत असेल ४५,००२ रूपये ( किक-स्टार्ट व्हॅरिअंट). सेल्फ स्टार्ट व्हॅरिअंटसाठी मात्र थोडेस जास्त म्हणजेच ४७,२०२ रुपये मोजावे लागणार आहेत.

कंपनीच्या या सर्वात स्वस्त बाइकमध्ये बीएस-४ मध्ये करण्यात आलेल्या सुधारणेसोबतच ऑटो हेडप्लँप्स आणि ऑन फीचर देखील देण्यात आले आहेत.

नव्या 'होंडा सीडी ११० ड्रीम डीएक्स बाइक'मध्ये टेलिस्कोपिक सस्पेंशन आणि ट्विन हायड्रॉलिक शॉक्स देण्यात आले आहेत. यासोबतच मेंटेनन्स फ्री बॅटरी, इलेक्ट्रिक स्टार्ट, ट्यूबलेस टायर्ससारख्या इतर सुविधाही पुरवण्यात आल्या आहेत.



या बाइकचे एकूण वजन १०९ किलो इतके आहे. तसेच बाइकची इंधन टँकची क्षमता ८ लीटर देण्यात आली आहे. ही नवी ड्रीम चार रंगांमध्ये उपलब्ध आहे. यात ब्लॅक अॅण्ड ग्रे, ब्लॅक अॅण्ड रेड, ब्लॅक अॅण्ड ग्रीन आणि ब्लॅक अॅण्ड ब्ल्यू ग्राफिक्स उपलब्ध आहेत.

मार्चच्या शेवटच्या आठवड्यात आपल्या 'सुपरहीट' स्कूटर अॅक्टिवानंतर होंडाने जुन्या स्कूटरला नवी झळाळी देत धोका पत्करला होता. मात्र कंपनीची ही खेळी यशस्वी झाली आहे. अनेक वर्षांपासून गायब झालेली होंडाची स्कूटर 'डियो' नव्या फीचर्ससह रिलाँच करण्यात आली आहे. काही मोठे बदल करून यात BS-IV चे पालन केले गेले आहे. फ्रंट पॅनल, नवा ड्युअल टोन कलर ऑप्शन देत या बाइकला पूर्वीपेक्षाही आकर्षक लूक देण्याचा यशस्वी प्रयत्न कंपनीने केला आहे.