क्रेटावर केली मात, बनली बेस्ट सेलिंग मिड-साइज SUV-
किया सेल्टॉस ही Kia ची भारतातली पहिली कार असून २ वर्षांमध्येच ही बेस्ट सेलिंग मिड-साइज एसयूव्ही बनली आहे. कंपनीने ऑक्टोबर २०२१ मध्ये १०,४८८ सेल्टॉस विकल्या. तर, गेल्या वर्षी याच महिन्यात ८,९०० सेल्टॉस कंपनीने विकल्या होत्या. कॉम्पॅक्ट SUV सेगमेंटमध्ये Hyundai Creta दुसऱ्या क्रमांकावर असून ऑक्टोबर 2021 मध्ये ६,४५५ क्रेटाची विक्री झाली. ऑक्टोबर २०२० मध्ये, १४,०२३ क्रेटा कंपनीने विकल्या होत्या. या अर्थाने एसयूव्हीच्या विक्रीत ५४ टक्के घट झाली आहे. सेमी-कंडक्टरचा तुटवडा हे देखील क्रेटाच्या घसरत्या विक्रीचे एक कारण असल्याचे सांगितले जात आहे. पण, सेल्टॉसवर कोणताही परिणाम झाला नाही, उलट विक्रीत चांगली वाढ नोंदवण्यात आली.
पेट्रोल-डिझेल दोन्ही इंजिन पर्याय, 16 kmpl आणि 21 kmpl पर्यंत मायलेज:
Kia Seltos ही एसयूव्ही पेट्रोल-डिझेल अशा दोन्ही इंजिन पर्यायांमध्ये येते. यामध्ये 1.5L पेट्रोल, 1.4L टर्बोचार्ज्ड पेट्रोल आणि 1.5L डिझेल असे ३ इंजिन पर्याय आहेत. या तिन्ही इंजिनसोबत ६-स्पीड मॅन्युअल ट्रान्समिशन गिअरबॉक्स मिळतो. याशिवाय, हे इंजिन ऑटोमॅटिक गिअरबॉक्ससह देखील उपलब्ध आहेत. पेट्रोल इंजिन व्हेरिअंटमधील किया सेल्टॉस 16 kmpl आणि डिझेल व्हेरिअंटमधील सेल्टॉस 21 kmpl पर्यंत मायलेज देते, असा कंपनीचा दावा आहे.
मिळतात अनेक लेटेस्ट व शानदार फीचर्स -
सेल्टॉसमध्ये अनेक लेटेस्ट फीचर्स मिळतात. यात UVO कनेक्टेड कार तंत्रज्ञानासह १०.२५-इंच टचस्क्रीन इन्फोटेन्मेंट सिस्टिम, एअर प्युरिफायर, अॅम्बियंट लाइटिंग, ८-इंच हेड-अप डिस्प्ले, व्हेंटिलेटेड फ्रंट सीट्स, पॉवर-अॅडजस्टेबल ड्रायव्हर सीट, ७-इंच मल्टी-इन्फॉर्मेशन डिस्प्ले, ८-स्पीकर बोस साउंड सिस्टिम आणि सनरूफ मिळते. याशिवाय, स्मार्टवॉच कनेक्टिव्हिटी, स्मार्ट की-रिमोट-इंजिन स्टार्ट आणि 'हॅलो किया' वेक-अप कमांड अशा फीचर्सचाही समावेश आहे. तसेच, सुरक्षेसाठी Kia Seltos मध्ये साइड आणि फ्रंट एअरबॅग्ज, हिल असिस्ट, व्हेइकल स्टेबिलिटी सिस्टिम, ब्लाइंड व्ह्यू आणि टायर प्रेशर मॉनिटरिंग सिस्टिम यांसारख्या लेटेस्ट सेफ्टी फीचर्सचा समावेश आहे.
Kia Seltos किंमत-
किया मोटर्स सध्या भारतात सेल्टॉससोबतच सोनेट आणि कार्निवल अशा तीन कार विकते. Kia Seltos एकूण ७ व्हेरिअंट्समध्ये आणि ३ भिन्न इंजिन पर्यायांमध्ये उपलब्ध आहे. Kia Seltos च्या बेसिक व्हेरिअंटची एक्स-शोरुम किंमत ९.९५ लाख रुपयांपासून सुरू होते, तर टॉप व्हेरिअंटची किंमत १८.१० लाख रुपयांपर्यंत जाते. Kia ने दोन वर्षांपूर्वीच, २०१९ मध्ये भारतात सेल्टॉससोबत पदार्पण केलं आणि कंपनीने अवघ्या दोन वर्षांमध्येच भारताच्या बाजारात यशाचा मोठा टप्पा गाठलाय.