रॉयल एनफिल्डची 'दिवाळी', विकल्या 'इतक्या' बुलेट

नवी दिल्ली : प्रसिद्ध दुचाकी बुलेटची निर्माता कंपनी रॉयल एनफिल्डने ऑक्टोबर महिन्यात विक्रमी विक्री केली आहे. कंपनीचे मुख्य कार्यकारी अधिकारी विनोद दसारी यांनी एंट्री लेव्हल बाइक जास्तीत जास्त ग्राहकांपर्यंत पोहोचवण्यासाठी 'अॅक्सेसिबिलिटी' नावाने पुढाकार घेतला होता. याअंतर्गत सण-उत्सवाच्या काळात स्टोअर्सची संख्याही वाढवण्यात आली. जाणकारांच्या मते, रॉयल एनफिल्डने ऑक्टोबर महिन्यात जवळपास ९५ हजार बुलेट्सची विक्री केली, जी कंपनीच्या ६० हजार मासिक विक्रीच्या ५० टक्के अधिक आहे.

चालू आर्थिक वर्षात गेल्या सात महिन्यात बुलेटच्या विक्रीत १६ टक्क्यांची घसरण नोंदवण्यात आली, ज्यामुळे कंपनीने मोठ्या प्रमाणात जाहिरात मोहिम सुरु केली. कंपनीचे सीईओ विनोद दसारी यांनी ‘इकॉनॉमिक टाइम्स’शी बोलताना सांगितलं की, ‘मंदीचा धोका होता. त्यामुळे प्रोडक्टमध्ये नाविन्यपूर्ण बदल आणण्यावर काम सुरु केलं. रॉयल एनफिल्डने कायम प्रसिद्ध राहिलेल्या बुलेट आणि क्लासिक ३५० मध्येच नवीन व्हेरिएंट लाँच केले. कंपनीने सणांच्या काळात देशभरात २५० नवीन स्टुडिओ स्टोर्स सुरु करुन वितरण जाळं वाढवलं. या गोष्टींमुळे कंपनीला मोठा फायदा झाला.’

वाचा : हॅरियर ते सफारी, टाटाच्या कार्सवर १ लाखापर्यंत सूट

‘ऑक्टोबरमध्ये मागणी वाढताच वेळेत प्रोडक्ट उपलब्ध करुन देणं आणि सर्व्हिसवर आमचा भर होता. बुलेट आवडणाऱ्या ग्राहकांपर्यंत पोहोचण्यासाठी आम्ही विविध माध्यमे आणि इन स्टोर उपक्रमांचा पर्याय निवडला,’ असं दसारी म्हणाले. दरम्यान, छोट्या गावांमध्येही बुलेटबाबत उत्सुकता असून ग्राहकांना यामध्ये रस आहे. लवकरच मध्यम वजनाच्या दुचाकीचा नवा बाजार तयार होऊ शकतो, असं ते म्हणाले.

वाचा : 'जावा'ची नवी दुचाकी, जाणून घ्या ६ गोष्टी

गेल्या काही महिन्यांपासून ऑटोमोबाइल क्षेत्राला मंदीचा मोठा फटका बसला. कारण, ग्राहकांनी खरेदीकडे पाठ फिरवली. पण दिवाळी आणि दसरा या कालावधीत मोठ्या प्रमाणात खरेदी करण्यात आली. रॉयल इनफिल्डसह इतर चारचाकी वाहनांचीही मोठ्या प्रमाणात विक्री वाढली. पुन्हा एकदा विक्री वाढण्याची कंपन्यांना प्रतिक्षा आहे.

मार्केटमधील नवीन ट्रेंड आणि ग्राहकांच्या भावना लक्षात घेणं याला सध्या कंपनीचं प्राधान्य असल्याचं दसारी म्हणाले. येत्या काळात परिस्थितीत सुधारणा होणार असून विक्री वाढेल, अशी अपेक्षाही त्यांनी व्यक्त केली.