म्हणजे जर तुम्हाला टाटा पंच खरेदी करायची असेल तर ९ महिन्यांपर्यंत वाट बघावी लागेल. तर, आता पटकन बघूया कोणत्या व्हेरिअंटवर किती वेटिंग पीरियड, विविध व्हेरिअंटची किंमत, फीचर्स आणि नेक्सॉनच्या तुलनेत पंच का ठरली कंपनीची सर्वात सेफ कार-
कोणत्या व्हेरिअंटची सर्वात जास्त डिमांड -
टाटा मोटर्सने ही एंट्री-लेव्हल एसयूव्ही Pure, Adventure, Accomplished आणि Creative अशा एकूण चार ट्रिममध्ये लाँच केली आहे. या ४ पैकी बेसिक व्हेरिअंट Pure ची ग्राहकांमध्ये सर्वात जास्त डिमांड आहे. अनेक शहरांमध्ये Pure व्हेरिअंटसाठी वेटिंग पीरियड ९ महिन्यांवर पोहोचलाय. तर, त्यानंतर Adventure व्हेरिअंटची सर्वात जास्त मागणी आहे. Adventure व्हेरिअंटसाठी ग्राहकांना ५ महिने वाट बघावी लागतेय. त्यानंतर Accomplished आणि Creative व्हेरिअंटसाठी देखील वेटिंग पीरियड २ ते ३ महिन्यांवर गेलाय. वेटिंग पीरियड कारच्या कलर ऑप्शन्सवर देखील अवलंबून आहे.
सर्वात सेफ टाटा कार -
सेफ्टीमध्ये Global NCAP कडून ५ स्टार रेटिंग मिळवणारी टाटा पंच ही कंपनीची तिसरी कार असून कंपनीची सर्वात सेफ कार देखील ठरली आहे. यापूर्वी टाटा मोटर्सच्या, अल्ट्रोझला जानेवारी २०२० मध्ये Global NCAP कडून ५ स्टार सुरक्षा रेटिंग मिळाले होते आणि डिसेंबर २०१८ मध्ये लोकप्रिय एसयूव्ही नेक्सॉनलाही ५ स्टार मिळाले होते. Punch लाँच होईपर्यंत नेक्सॉन कंपनीची सर्वात सेफ एसयूव्ही होती. पण, क्रॅश टेस्टमध्ये टाटा पंचनेही ५-स्टार रेटिंग प्राप्त केले, यासोबतच नेक्सॉनपेक्षा जास्त गुण मिळवल्यामुळे पंच आता कंपनीची सर्वात सेफ कार ठरली आहे. Tata Nexon ला प्रौढांच्या सुरक्षेमध्ये १७ पैकी १६.०६ गुण तर, Punch ला प्रौढांच्या सुरक्षेत १६.४५ गुण मिळाले. याशिवाय लहान मुलांच्या सुरक्षेमध्ये नेक्सॉनला ४९ पैकी २५ तर पंचला ४९ पैकी ४०.८९ गुण मिळालेत.
फीचर्स आणि इंजिन -
टाटा पंचमध्ये ७ इंची टचस्क्रीन इन्फोटेन्मेंट सिस्टिम, अँड्रॉइड ऑटो आणि अॅपल कारप्ले, आयआरए कनेक्टेड कार टेक्नॉलॉजी, २७ कनेक्टेड फीचर्स देण्यात आले आहेत. दुसरीकडे सुरक्षेच्या दृष्टीनेही ही शानदार असून सेफ्टीमध्ये ५-स्टार रेटिंग मिळाले आहे. यात रिव्हर्स कॅमेरा, क्रूझ कंट्रोल, ऑटोमॅटिक रेन सेन्सिंग वायपर, एबीएस विथ ईबीडी, दोन एअरबॅग, ISOFIX एंकर, कॉर्नर स्टॅबिलिटी कंट्रोल, टायर पंक्चर रिपेअर किट देण्यात आले आहेत. टाटा पंच कंपनीने फक्त एका इंजिन पर्यायासह आणली आहे. यामध्ये कंपनीने ३ सिलेंडरसह १.२ लिटर क्षमतेचे नॅचरली एस्पिरेटेड पेट्रोल इंजिन वापरले आहे. जे 86hp पॉवर आणि 113Nm टॉर्क जनरेट करते. हे इंजिन ५-स्पीड मॅन्युअल आणि ऑटोमॅटिक गिअरबॉक्ससह येते.
डिझेल इंजिनमध्येही येणार टाटा पंच, किंमत किती -
टाटा पंचला Pure ची किंमत ५.४९ लाख रुपये, Adventure ट्रिम लेवलची किंमत ६.३९ लाख रुपये, Accomplished ट्रिम लेवलची किंमत ७.२९ लाख आणि Creative ट्रिम लेव्हलची किंमत ८.४९ लाख रुपये आहे. या किंमती मॅन्युअल ट्रान्समिशन पर्यायाच्या आहेत. तर, Adventure, Accomplished आणि Creative व्हेरिअंटची AMT पर्यायाची किंमत मॅन्युअल प्रकारांपेक्षा ६०,००० रुपये अधिक आहे. म्हणजेच, टॉप मॉडेल टाटा पंच क्रिएटिव्ह ट्रिम लेव्हल AMT ची किंमत ९.०९ लाख रुपये आहे.
दरम्यान, लाँचिंगनंतर मिळालेल्या जबरदस्त प्रतिसादामुळे कंपनी लवकरच टाटा पंचला डिझेल इंजिनमध्येही लाँच करणार आहे. कंपनीने याबाबत अद्याप अधिकृत माहिती दिलेली नाही, पण काही दिवसांपूर्वीच डिझेल व्हेरिअंटमधील टाटा पंच पुण्यामध्ये टेस्टिंग दरम्यान दिसून आली आहे.