Tata Altroz EV -
टाटा मोटर्स आपली लोकप्रिय प्रीमियम हॅचबॅक कार Tata Altroz आता इलेक्ट्रिक व्हर्जनमध्ये उतरवण्याच्या तयारीत आहेत. Tiago EV, Tigor EV आणि लोकप्रिय Nexon EV यांच्यानंतर Altroz EV ही टाटाची भारतातील चौथी इलेक्ट्रिक कार असेल. ही कार १० ते १२ लाख रुपयांदरम्यान लाँच होईल अशी शक्यता आहे. Tata Motors ने २०२० मध्ये झालेल्या ऑटो एक्स्पोदरम्यान Altroz EV कन्सेप्टचा खुलासा केला होता. ही कार कंपनीच्या निक्सॉन इवीनंतर लाँच होण्याची अपेक्षा होती, पण अजून Altroz EV लाँच झालेली नाही. मात्र आता ही कार लवकरच लाँच होण्याची शक्यता आहे. मीडिया रिपोर्ट्सनुसार, निक्सॉन इवीपेक्षा (Nexon EV) अल्ट्रोज इवीमधील बॅटरी मोठी असेल, अतिरिक्त आणि मोठ्या बॅटरी पॅकद्वारे ही कार २५ ते ४० टक्के अधिक ड्रायव्हिंग रेंज देईल. ही कार एकदा पूर्ण चार्ज केल्यानंतर ५०० किलोमीटरपर्यंतचा प्रवास करण्यास सक्षम असेल असे सांगितले जात आहे. Altroz EV मध्ये टाटा मोटर्स निक्सॉन इवीप्रमाणेच झिपट्रॉन(Ziptronic) इलेक्ट्रिक पॉवरट्रेनचा वापर करेल.
Tesla Model 3 -
अमेरिकेची आघाडीची इलेक्ट्रिक कार कंपनी टेस्लाची पहिली इलेक्ट्रिक कार Tesla Model 3 भारतात लवकरच लाँच होणार आहे. आयात शुल्क कमी करण्याची मागणी काही दिवसांपूर्वीच कंपनीचे सीईओ एलन मस्क यांनी भारत सरकारकडे केली आहे. या वर्षाच्या अखेरपर्यंत Tesla Model 3 भारतात लाँच होण्याची शक्यता आहे. सुरूवातीच्या टप्प्यात Tesla Cars चीनच्या शांघाई येथून CBU रूटच्या माध्यमातून भारतात आयात केल्या जातील. टेस्ला मॉडेल-३ भारतात कंप्लिटली बिल्ट यूनिट (CBU) स्वरूपात येईल. आंतरराष्ट्रीय बाजारात आधीपासून उपलब्ध असलेल्या या कारची भारतात किंमत सुमारे ६० ते ७० लाख रुपये असू शकते. एकदा चार्ज केल्यावर ही कार ४२३ ते ५६८ किलोमीटरपर्यंतच अंतर पार करते.
Updated Hyundai Kona -
ह्युंडाई कंपनीने नोव्हेंबर २०२० मध्ये अपडेटेड कोना (Hyundai Kona)इलेक्ट्रिक एसयूव्हीचा खुलासा केला होता, वर्षाच्या अखेरीस किंवा पुढील वर्षाच्या सुरूवातीला ही कार लाँच होण्याची शक्यता आहे. फेसलिफ्ट कोनामध्ये सध्याच्या मॉडेलपेक्षा काही बदल झालेले दिसतील. 2022 ह्युंडाई ई कोना शिफ्ट-बाय-वायर सिस्टिम आणि स्मार्ट अॅड्जस्टेबल रीजनरेटिव ब्रेकिंग सिस्टिमसह येईल. याच्या लाँग रेंज व्हेरिअंटमध्ये २०४ PS इलेक्ट्रिक मोटरसोबत ६४kWh बॅटरी मिळेल, तर स्टँडर्ड मॉडेलमध्ये इलेक्ट्रिक मोटरसह ३९.२kWh बॅटरी पॅक असेल. लाँग रेंज व्हेरिअंटमधील कोना ४८४ किमी इतकी दमदार रेंज देईल असा दावा केला जात आहे. तर, स्टँडर्ड व्हेरिअंटमध्ये ३०५ किमीपर्यंत ड्रायव्हिंग रेंज मिळेल.
'महिंद्रा'ची e-XUV300 -
महिंद्रा अँड महिंद्रा आपली सब-कॉम्पॅक्ट एसयूव्ही XUV300 आता इलेक्ट्रिक व्हर्जनमध्ये लाँच करणार आहे. २०२० मध्ये झालेल्या ऑटो एक्स्पोदरम्यान कंपनीने e-XUV300 सादर केली होती. पुढील वर्षाच्या सुरूवातीला ही कार भारतात लाँच होण्याची शक्यता आहे. महिंद्राची ही इलेक्ट्रिक एसयूव्ही टाटा निक्सॉन ईव्हीला थेट टक्कर देईल. महिंद्रा इलेक्ट्रिक स्कॅलेबल अँड मॉड्यूलर आर्किटेक्चरवर आधारित असलेली ही कंपनीची पहिली कार असेल. एकदा पूर्ण चार्ज केल्यानंतर e-XUV300 ३७५ किमीपर्यंत ड्रायव्हिंग रेंज देईल असा दावा करण्यात आला आहे. ही ड्रायव्हिंग रेंज टाटाच्या नेक्सॉन ईव्हीपेक्षा जास्त आहे. याशिवाय महिंद्रा भारतात आपली ई-केयूवी100 देखील लाँच करण्याच्या तयारीत आहे. ही इलेक्ट्रिक कार टाटाच्या आगामी अल्ट्रोज आणि एमजीच्या आगामी ईव्हीला टक्कर देईल.