६ महिने वेटिंग पीरियड
अनेक वाहनांच्या डिलीव्हरीसाठी ग्राहकांना ६-६ महिने वाट पाहावी लागत आहे. त्यामुळे आज आम्ही तुम्हाला देशात मोठ्या प्रमाणात विकल्या जाणाऱ्या आणि ज्यावर मोठा वेटिंग पीरियड आहे, अशा टॉप ५ सेडान कार्सची माहिती देणार आहोत. मोठा वेटिंग पीरियड असलेल्या सेडानची यादी पाहता, खरेदीदार होंडा सिटी ई:एचईव्ही, ह्युंदाई ऑरा आणि मारुती डिझायर या कारच्या डिलीव्हरीची सर्वाधिक वाट पाहत आहेत. तसेच टाटा टिगॉर आणि स्कोडा स्लाव्हिया या कारचा प्रतीक्षा कालावधी देखील सध्या वाढत आहे.
वाचा : चार्टर प्लेन म्हणजे काय? बुकिंग कुठे आणि कसं करतात, किती रुपयांचा खर्च येतो?
Honda City e:HEV
होंडा कंपनीने अलिकडेच त्यांची हायब्रिड कार भारतात लाँच केली आहे. या कारचं नाव Honda City e:HEV असं आहे. ही भारतातील पहिली मास-मार्केट हायब्रिड कार आहे. लाँचिंगपासून या कारला ग्राहकांकडून चांगला प्रतिसाद मिळतोय. या कारसाठीच्या वेटिंग पीरियडबद्दल बोलायचे झाल्यास ग्राहकांना e:HEV हायब्रिड कारसाठी तब्बल ६ महिने वाट पाहावी लागत आहे. देशात अद्याप इलेक्ट्रिक किंवा हायब्रिड कारसाठी मोठी मागणी नाही, मात्र त्यातल्या त्यात होंडाच्या हायब्रिड कारला ग्राहकांचा चांगला प्रतिसाद मिळतोय.
Hyundai Aura
ह्युंदाई ऑरा (Hyundai Aura) या कारसाठीचा वेटिंग पीरियड देखील खूप वाढला आहे. प्रामुख्याने या कारच्या सीएनजी व्हेरिएंटसाठी ग्राहकांच्या रांगा लागत आहेत. या कारच्या सीएनजी मॉडेलवर तब्बल ६ महिन्यांचा वेटिंग पीरियड आहे. तर या छोट्या ह्युंदाई सेडानच्या पेट्रोल व्हेरियंटच्या डिलीव्हरीसाठी सीएनजी मॉडेलच्या तुलनेत थोडी कमी प्रतीक्षा करावी लागेल. तुम्ही जर या कारचं पेट्रोल मॉडेल खरेदी करत असाल तर तुम्हाला किमान तीन महिने वाट पाहावी लागेल. कंपनी पूर्वी या कारचं डिझेल मॉडेल देखील विकत होती. मात्र हे मॉडेल आता कंपनीने बंद केलं आहे.
Maruti Suzuki Dezire
मारुती ही देशातली सर्वात मोठी वाहन उत्पादक कंपनी आहे. कंपनीच्या हॅचबॅक, सेडान आणि मिनी व्हॅन सेगमेंटमधील वाहनं त्या-त्या सेगमेंटमध्ये चांगली कामगिरी करत आहेत. सेडान सेगमेंटमधील कंपनीची लोकप्रिय कार मारुती सुझुकी डिझायर या कारला मोठी मागणी आहे. ही कार देशांतर्गत बाजारपेठेत सर्वाधिक विकल्या जाणाऱ्या वाहनांपैकी एक आहे आणि मोठ्या मागणीमुळे या कारसाठीचा वेटिंग पीरियड वाढला आहे. डिझायरच्या डिझेल व्हेरिएंटसाठी ग्रहकांना सहा महिने, तर पेट्रोल व्हेरिएंटसाठी तीन महिने वाट पाहावी लागत आहे.
Tata Tigor
Honda City e:HEV, Hyundai Aura आणि Maruti Dzire सोबत टॉप ५ सेडान कार्सच्या यादीत टाटा मोटर्सची एक कार आहे. टाटा टिगॉर असं या कारचं नाव आहे. टाटा टिगॉर ही देखील देशात सर्वात जास्त विकल्या जाणाऱ्या सेडान कार्सपैकी एक आहे. तुम्ही जर टिगॉर खरेदी करत असाल तर तुम्हाला किमान चार महिने वाट पाहावी लागेल. तसेच या कारच्या सीएनजी व्हेरिएंटला देखील मोठी मागणी आहे. टाटा टिगॉर सीएनजीसाठी तुम्हाला किमान तीन महिने वाट पाहावी लागेल.
वाचा : इलेक्ट्रिक वाहनांच्या आगींचा सिलसिला सुरुच, आता थेट शोरूम पेटलं, सगळ्या EV जळून खाक
Skoda Slavia
स्कोडा ही लग्झरी वाहन उत्पादक कंपनी आहे. सहसा लग्झरी वाहनांसाठी फार वेळ वाट पाहावी लागत नाही. कारण देशात बजेट आणि मिड रेंज सेगमेंटमधील वाहनांना मोठी मागणी असते. मात्र स्कोडा कपनीने अलिकडेच लाँच केलेली स्लाव्हिया ही सेडान देखील सर्वाधिक वेटिंग पीरियड असलेल्या वाहनांच्या यादीत समाविष्ट आहे. तुम्ही जर या कारचं १.० लीटर टर्बो-पेट्रोल व्हर्जन खरेदी करण्याचा विचार करत असाल तर तुम्हाला २ महिने वाट पाहावी लागेल. तर दुसऱ्या बाजूला या कारच्या १.५ लीटर पेट्रोल मॉडेलसाठी ग्राहकांना किमान ४ महिने वाट पाहावी लागेल.
वाचा : भारतीयांच्या टॅलेंटला तोड नाय! ११ वर्षांची मेहनत फळाला आली, गणिताच्या शिक्षकाने बनवली Solar Car