लोकांचा विश्वास, रतन टाटांच्या आयडिया आणि स्वदेशी भावना
आज जगभरातील कित्येक देशांमध्ये टाटा मोटर्सची व्यावसायिक वाहनं चालवली जात आहेत. यामागे रनत टाटांची दूरदृष्टी आहे. टाटाची कमर्शियल वाहनं, प्रवासी वाहनं आणि लग्झरी वाहनंदेखील जगभरातल्या रस्त्यांवर रुबाबात मिरवत आहेत. पण आज आपण कंपनीच्या प्रवासी वाहनांबद्दलची माहिती जाणून घेणार आहोत. रतन टाटांनी १९९१ साली पहिली एसयूव्ही टाटा सिएरा लाँच केली. ही कार त्यावेळी कुतूहलाचा विषय बनली होती. कारण एका भारतीय कंपनीने ही एसयूव्ही बनवली होती. ही कार भारतीयांच्या पसंतीस उतरली. ही पूर्णपणे देसी कार होती.
वाचा : Mahindra XUV400 Electric SUV नेक्सॉन ईव्हीचं मार्केट खाणार? 'या' महिन्यात लाँच होणार नवीन EV
टाटा इंडिका आणि सफारीने नशीब बदललं
टाटा सिएराला पसंती मिळत असली तरी टाटा मोटर्स ही कंपनी १९९८ साली गावागावत पोहोचली ती टाटा इंडिका कारमुळे. कंपनीने १९९८ साली टाटा इंडिका ही ५ सीटर फॅमिली कार लाँच करून मध्यमवर्गीय लोकांच्या अंगणात जागा मिळवली. या काळात मारुती सुझुकी कंपनीची अल्टो ही कार देखील भारतात उपलब्ध होती आणि अल्टो कारला देखील चांगली लोकप्रियता मिळाली. मात्र टाटा इंडिकाचा स्वॅग जरा वेगळाच होता. फॅमिली कार म्हणजे इंडिका असं म्हटलं जाऊ लागलं होतं.
वाचा : होंडा कारप्रेमींसाठी वाईट बातमी! Honda City सह कंपनी ३ कार्सचं उत्पादन बंद करणार, कारण काय?
टाटा सुमोची देशभर लोकप्रियता
टाटा मोटर्सने १९९४ साली टाटा सुमो ही एक शानदार एसयूव्ही लाँच केली. जी २०१९ पर्यंत विकली जात होती. या कारला देखील प्रचंड लोकप्रियता मिळाली. पूर्वी प्रत्येक नेत्याकडे, अभिनेत्याकडे टाटा सुमोचं एक मॉडेल तरी असायचंच. शहरं आणि गावखेड्यात देखील टाटा सुमो मोठ्या प्रमाणात विकली जात होती. १९९८ साली कंपनीने आणखी एक धमाका केला. टाटा सफारी ही त्या काळातली सर्वात पॉवरफुल एसयूव्ही कंपनीने लाँच केली होती. ही एक आयकॉनिक एसयूव्ही होती. लोक आजही या कारची चर्चा करतात.
वाचा : Electric Scooter की पेट्रोल स्कूटर फायदेशीर? अवघ्या एका मिनिटात समजून घ्या
रतन टाटांचा ड्रीम प्रोजेक्ट : टाटा नॅनो
२००८ च्या जानेवारी महिन्यात रतन टाटांनी एक खास कार लाँच करून जगभरातल्या ऑटोमोबाईल कंपन्यांचं लक्ष वेधून घेतलं. या महिन्यात रतन टाटांनी त्यांची ड्रीम कार टाटा नॅनो लाँच केली. अवघ्या १ लाख रुपये इतक्या किंमतीत टाटांनी जगातली सर्वात स्वस्त कार लाँच केली. भारतीय लोक दुचाकीवरून ३-४ जण असुरक्षित प्रवास करतात ते थांबावं या उद्देशाने बाइकच्या खर्चात टाटांनी कार लाँच केली होती. मात्र टाटांचा हा ड्रीम प्रोजेक्ट फेल गेला. २०१९ मध्ये टाटांनी या कारचं उत्पादन थांबवलं. मात्र नॅनो फ्लॉप गेल्यावर टाटांनी त्यांची रणनीति बदलली आणि त्यांच्या कार्सच्या फीचर्स आणि लूकवर अधिक भर देण्यास सुरुवात केली.
देशातली तिसरी सर्वात मोठी वाहन उत्पादक कंपनी
आता टाटा मोटर्स ही देशातली तिसरी सर्वात मोठी प्रवासी वाहन निर्माती कंपनी आहे. पहिल्या क्रमांकावर मारुती सुझुकी आणि दुसऱ्या नंबरवर ह्युंदाई मोटर इंडिया आहे. टाटा मोटर्स कंपनी भारतीय बाजारात सध्या उत्तम कामगिरी करत आहे. मे २०२२ मध्ये कंपनीने विक्रीच्या बाबतीत ह्युंदाईला मागे टाकत देशात दुसरं स्थान पटकावलं होतं. या दोन कंपन्यांच्या विक्रीत आत्ता खूपच कमी फरक आहे. कंपनीची नेक्सॉन आणि टाटा पंच या दोन कॉम्पॅक्ट एसयूव्ही भारतीय बाजारात धुमाकूळ घालत आहेत. या दोन्ही कार विक्रीच्या बाबतीत टॉप १० मध्ये आहेत.
टाटाच्या भारतात ९ कार उपलब्ध
टाटा मोटर्स सध्या भारतात हॅचबॅक सेगमेंटमध्ये टाटा टियागो, टाटा अल्ट्रॉझ या दोन कार विकते. सेडान्सच्या सेगमेंटमध्ये टाटा टिगॉर ही कार उपलब्ध आहे. तर मायक्रो एसयूव्ही टाटा पंच, कॉम्पॅक्ट एसयूव्ही नेक्सॉन आणि एसयूव्ही सेगमेंटमध्ये टाटा हॅरियर आणि टाटा सफारी या कार विकते. टाटा मोटर्स कंपनी भारतात दोन इलेक्ट्रिक कार देखील विकते. टाटा नेक्सॉन ईव्ही आणि टाटा टिगॉर ईव्ही अशा या ई-कार्सची नावं आहेत. कंपनी या वर्षी एक अशी इलेक्ट्रिक कार लाँच करणार आहे जी बॅटरी आणि पेट्रोल-डिझेलवर देखील चालेल.
वाचा : भारतात १० नवीन ७ सीटर कार लाँच होणार, मारुतीपासून टोयोटापर्यंतच्या कंपन्या रांगेत