कल्याणजवळील पोल्ट्रीतील कोंबड्यांना बर्ड फ्लू

म. टा. वृत्तसेवा, कल्याण

कल्याणजवळील रायता येथील गावठी कोंबड्यांच्या पोल्ट्री फार्ममधील मृत कोंबड्यांचा बर्ड फ्लूचा अहवाल पॉझिटिव्ह आल्याने या पोल्ट्रीमधील सुमारे ८०० ते १००० कोंबड्या मारून टाकण्यात आल्या आहेत. मंगळवारी सकाळी या कोंबड्यांना बर्ड फ्लू झाल्याचे स्पष्ट झाले होते.

रायता गावात स्थानिक नागरिकाने तीन महिन्यांपूर्वी पोल्ट्री फार्म सुरू केले होते. या पोल्ट्रीमधून तो गावठी कोंबड्यांची विक्री करत होता. चार-पाच दिवसांपासून पोल्ट्रीमधील कोंबड्या अचानक मृत्युमुखी पडू लागल्याने बर्ड फ्लूचा संशय आला. यामुळे पोल्ट्री चालकाने स्थानिक आरोग्य विभागाला याची माहिती दिल्यानंतर मेलेल्या कोंबड्यांचे नमुने तपासणीसाठी पाठविण्यात आले होते. या अहवालात या कोंबड्यांना बर्ड फ्लूची लागण झाल्याचे स्पष्ट झाल्याने खबरदारीचा उपाय म्हणून या पोल्ट्रीमधील कोंबड्या मारून टाकण्याचा निर्णय घेण्यात आला. सध्या या पोल्ट्रीमध्ये ८०० ते १००० कोंबड्या असून या सर्व कोंबड्या मारून पोल्ट्री चालकाच्या शेतातच खड्डा खणून पुरल्या जाणार आहेत. संध्याकाळी ६ वाजण्याच्या सुमारास ठाणे आरोग्य विभागाचे कर्मचारी या कोंबड्या नष्ट करण्यासाठी दाखल झाले असून या कोंबड्या मारून नंतर पुरून टाकल्या जाणार असल्याचे त्यांनी सांगितले. दरम्यान, या घटनेमुळे परिसरात भीतीचे वातावरण पसरले आहे.