वृत्तसंस्था, नवी दिल्ली वाहनचालकाच्या खात्यातून टोल रक्कम परस्पर वसूल करण्याची सुविधा देणाऱ्या फास्टॅग प्रणाली अंतर्गत आतापर्यंत १.१० कोटी स्टिकर्स वितरित करण्यात आले आहेत. राष्ट्रीय महामार्ग प्राधिकरणाच्या अधिकाऱ्याने मंगळवारी ही माहिती दिली. आतापर्यंत विविध माध्यमांतून एकूण १.१० कोटी फास्टॅग स्टिकरचे वाटप झाले आहे. दररोज सरासरी दीड ते दोन लाख स्टिकरचे वितरण होत आहे. यावरून फास्टॅग प्रणाली देशभरातून स्वीकारली गेल्याचे दिसत आहे, असे प्राधिकरणाच्या अधिकाऱ्याने सांगितले. फास्टॅग लागू केल्यानंतर केवळ आठ दिवसांत या प्रणालीद्वारे होणाऱ्या व्यवहारांची संख्या २४ लाखांवर पोहोचली आहे. या प्रणालीचा वापर करताना वाहनचालकांना काही समस्याही जाणवत आहेत. या सर्व समस्यांचा निपटारा केला जात आहे, अशी माहितीही या अधिकाऱ्याने दिली. टोल नाक्यांवरील वाहतूक कोंडी कमी होऊन प्रदूषणात घट व्हावी या हेतूने प्राधिकरणाने १५ डिसेंबरपासून देशभरात फास्टॅग प्रणाली लागू केली आहे. या स्टिकर्ससाठी अर्ज केलेल्यांपैकी अनेक चालकांना अद्याप ते न मिळाल्याने १५ जानेवारीपर्यंत रोखीने टोल भरण्याची मुभा देण्यात आली आहे. रोखीने टोल भरण्यासाठी प्रत्येक टोल नाक्यावरील २५ टक्के मार्गिका राखीव ठेवण्यात आल्या आहेत. राष्ट्रीय महामार्ग प्राधिकरणाच्या एकूण ५२३ टोल नाक्यांवर फास्टॅग प्रणाली सुरू करण्यात आली आहे.
फास्टॅगचे १.१० कोटी स्टिकर्स वितरित
वाहनचालकाच्या खात्यातून टोल रक्कम परस्पर वसूल करण्याची सुविधा देणाऱ्या फास्टॅग प्रणाली अंतर्गत आतापर्यंत १.१० कोटी स्टिकर्स वितरित करण्यात आले आहेत. राष्ट्रीय महामार्ग प्राधिकरणाच्या अधिकाऱ्याने मंगळवारी ही माहिती दिली.
Maharashtra Times 25 Dec 2019, 5:01 am