वृत्तसंस्था, मुंबई
आठवड्याच्या अखेरच्या सत्रात, शुक्रवारी मुंबई व राष्ट्रीय शेअर बाजाराच्या (निफ्टी) निर्देशांकांत किंचित घसरण नोंदविली गेली. मुंबई शेअर बाजाराचा निर्देशांक ४५ अंकांनी घसरून ३८६४५वर स्थिरावला. तर, निफ्टी तीन अंकाच्या किरकोळ घसरणीसह ११६८०वर स्थिरावला.
गेल्या पाच सत्रांमध्ये मुंबई शेअर बाजाराच्या निर्देशांकाने जोरदार कामगिरी नोंदवली आहे. चालू आठवड्यातही निर्देशांकाने सातत्यपूर्ण कामगिरी केली. मात्र ७१च्या नीचांकी स्तरापर्यंत घसरलेला रुपया व अमेरिका-चीनदरम्यानच्या व्यापारयुद्धाचे पडसाद शुक्रवारी निर्देशांकाच्या कामगिरीवर उमटले. गुंतवणूकदारांनी सावध भूमिका घेतल्याने निर्देशांकाची स्थिती 'जैसे थे' राहिली. शुक्रवारी संस्थात्मक गुंतवणूकदारांनी १,५९८ कोटी रुपयांचे समभाग विकले. तर, परदेशी गुंतवणूकदारांनी ९५८ कोटी रुपयांच्या समभागांची खरेदी केली.