एयरटेल पेमेंट बॅंक: पैसे जमा कराल, तेवढा टॉक टाइम मिळणार

मटा ऑनलाइन वृत्त । नवी दिल्ली

देशात कॅशलेस अर्थव्यवस्थेचे वारे वाहत असताना जास्तीत जास्त ग्राहकांना आकर्षित करण्यासाठी भारती एयरटेल कंपनीच्या पेमेंट बॅंकेने नवीन ऑफर जाहिर केली आहे. या बॅंकेत जेवढे पैसे जमा कराल, तेवढ्याचा मोबाइल टॉक टाइम ग्राहकांना देण्यात येणार आहे. त्यामुळे नवीन बॅंक खाते उघडण्याबरोबरच मोफतचा टॉक टाइम मिळण्याचा दुहेरी लाभ ग्राहकांना मिळणार आहे.

एयरटेल पेमेंट बॅंकेत खाते खोलल्यावर पहिल्यांदा डिपॉझिट करणाऱ्यांना याचा लाभ मिळणार आहे. म्हणजे बॅंक खात्यात १०० रुपये भरले तर १०० रुपयांचा आणि हजार रुपये भरले तर हजाराचा टॉक टाइम ग्राहकांना मिळणार आहे. मात्र हा टॉक टाइम केवळ ३० दिवसांसाठीच वैध राहणार असून देशभरात एयरटेल ते एयरटेल नंबरवर संपर्क साधण्यासाठी त्याचा वापर करता येणार असल्याचे कंपनीने स्पष्ट केले आहे.

रिझर्व्ह बॅंक ऑफ इंडियाने गेल्यावर्षी ११ कंपन्यांना पेमेंट बॅंक सुरु करण्यास मंजूरी दिली होती. इतर बॅंकांपेक्षा पेमेंट बॅंकेची कार्यप्रणाली सर्वात वेगळी आणि हटके आहे. पेमेंट बॅंकेत जास्तीत जास्त १ लाखापर्यंतची रक्कम जमा केली जाऊ शकते. बचत आणि चालू अशी दोन्ही खाती यात उघडता येऊ शकतात. या बॅंका ग्राहकांना डेबिट कार्ड देऊ शकतात.पण त्यांना क्रेडीट कार्ड देण्याचा अधिकार नसल्याचे रिझर्व्ह बॅंकेने या आधीच स्पष्ट केले आहे.