ई-कॉमर्स कंपन्यांकडून १.४ लाख रोजगार

नवी दिल्ली: सणासुदीच्या दिवसांतील वाढती मागणी लक्षात घेता अॅमेझॉन व फ्लिपकार्ट या आघाडीच्या ई-कॉमर्स कंपन्यांनी तब्बल एक लाख ४० हजार कंत्राटी कर्मचाऱ्यांची नेमणूक केली आहे. वस्तूंचा पुरवठा (डिलिव्हरी) करण्याच्या कामी या कर्मचाऱ्यांचा प्रामुख्याने उपयोग करण्यात येणार आहे.

अॅमेझॉन व फ्लिपकार्टने दरवर्षीप्रमाणे यंदाही ग्राहकांसाठी धमाकेदार उत्सवी ऑफर सेल आयोजित केले आहेत. या कालावधीत दोन्ही कंपन्यांच्या उलाढालीत प्रचंड प्रमाणात वाढ होते. यामुळे या कंपन्यांच्या पुरवठा साखळीवर कमालीचा ताण निर्माण होतो. या पार्श्वभूमीवर अॅमेझॉनने ९० हजार तर, फ्लिपकार्टने ५० हजार कंत्राटी कर्मचाऱ्यांची भरती केली आहे. अॅमेझॉनतर्फे मुंबई, दिल्ली, हैदराबाद, चेन्नई, बंगळुरू, अहमदाबाद आणि पुणे या शहरांसाठी ही भरती करण्यात आली आहे.

३० टक्के रोजगारवाढ

फ्लिपकार्टने गेल्या वर्षीच्या तुलनेत यंदा ३० टक्के अधिक कंत्राटी (अप्रत्यक्ष) रोजगारांची निर्मिती केली असल्याचा अंदाज असून एकूण अप्रत्यक्ष रोजगारांची संख्या साडेसहा लाख झाली आहे.