अंबानी बंधू 'व्हर्च्युअली' एकत्र!

मटा ऑनलाइन वृत्त । मुंबई

दहा वर्षांपूर्वी आपापली वेगळी चूल मांडलेले अंबानी बंधू आता रिलायन्स जिओच्या निमित्तानं एकत्र आले आहेत. आपल्या वडिलांचं धीरुभाई अंबानी यांचं स्वप्न पूर्ण करण्यासाठी आपल्या भावासोबत काम करण्याचा निर्णय अनिल अंबानी यांनी घेतला आहे. त्यांच्या 'रिलायन्स ग्रुप' वर हे टि्वट करून सांगितलं आहे. अर्थात हे एकत्र येणं केवळ 'व्हर्च्युअल' पातळीवर आहे. म्हणजेच अनिल अंबानी यांची रिलायन्स कम्युनिकेशन आणि मुकेश अंबानी यांची रिलायन्स जिओ या दोन्ही कंपन्या यापुढे त्यांचं टेलिकॉम इन्फ्रास्ट्रक्चर वाटून घेणार आहेत. रिलायन्सच्या फोर जी ग्राहकांना यामुळे अधिक चांगल्या सेवेचा लाभ होईल.

टेलिकॉम इन्फ्रास्ट्रक्चरमध्ये रिलायन्स कम्युनिकेशनचे मोबाइल टॉवर्स, ऑप्टीकल फायबरचं जाळं, स्पेक्ट्रम आणि रिलायन्स जिओच्या इलेक्ट्रॉनिक्स आणि फोर जी एलटीई सेवा एकत्र काम करतील, अशी माहिती अनिल अंबानी यांनी रिलायन्स कम्युनिकेशनच्या भागधारकांना मंगळवारी दिली.