अपना बँक झाली ५० वर्षांची!

मुंबई ः गिरणी कामगारांनी स्थापन केलेल्या अपना सहकारी बँकेने सुवर्ण महोत्सवी वर्षात पदार्पण केले आहे. २९ मार्च १९६८ रोजी गिरणी कामगारांच्या आर्थिक गरजा पूर्ण करण्यासाठी अस्तित्वात आलेल्या या बँकेचा सुवर्ण महोत्सवी शुभारंभ कार्यक्रम मंगळवारी (२८ मार्च) येथे आयोजित करण्यात आला आहे. या कार्यक्रमाला मुख्यमंत्री देवेंद्र फडणवीस व राष्ट्रवादी काँग्रेसचे अध्यक्ष शरद पवार उपस्थित राहणार आहेत.

बँकेच्या वाटचालीबद्दल अध्यक्ष दत्ताराम चाळके यांनी सांगितले, मार्च २००८पर्यंत केवळ १३ शाखा असणाऱ्या या बँकेच्या आज ८१ शाखा आहेत. एकूण व्यवसायाचा पाच हजार कोटींचा टप्पा बँकेने ओलांडला आहे. अपना बँकेने मालाडमधील केअर सहकारी बँक, सांगलीतील आष्टा अर्बन सहकारी बँक, कोल्हापूर येथील श्री बलभीम सहकारी बँक या तीन बँका स्वतःत यशस्वीरीत्या विलीन करून घेतल्या. या बँकांतील कर्मचाऱ्यांनाही अपना बँकेने सामावून घेतले आहे. अपना सहकारी बँकेला रिझर्व्ह बँकेने ऑक्टोबर २०१५मध्ये मल्टिस्टेट शेड्युल्ड बँकेचा दर्जा दिला. यामुळे कर्नाटक, गुजरात व गोवा येथे शाखाविस्ताराची बँकेला अनुमती देण्यात आली आहे.