करोनामुळे ६० वर्षात पहिल्यांदाच हे घडणार

टोकियो : चीनमध्ये उत्पन्न झालेल्या करोना विषाणूने संपूर्ण जगाला कवेत घेतले आहे. या विषाणूला रोखण्यासाठी लाॅकडाऊन हाच एकमेव मार्ग आहे. मात्र त्यामुळे अर्थव्यवस्थेला मोठा फटका बसला आहे. आशियाला करोनाचा मोठा दणका बसणार आहे. ६० वर्षात पहिल्यांदाच आशियाचा विकासदर शून्यावर जाईल, अशी भीती आंतरराष्ट्रीय नाणेनिधीने (IMF)गुरुवारी व्यक्त केली आहे.

सोशल डिस्टंन्सिंगचा वापर करून अत्यावश्यक सेवा देण्याचा प्रयत्न तिथल्या सरकारकडून केला जात आहे. त्यामुळे अर्थचक्राला आधार मिळाला असल्याचे मत नाणेनिधीचे संचालक चॅंगाँग री यांनी सांगितले. ते म्हणाले की, करोनामुळे संपूर्ण जगासाठी सध्या संघर्ष आणि आव्हानात्मक परिस्थिती आहे. त्यात आशिया आणि प्रशांत या क्षेत्रालाही याचा फटका बसणार आहे. ही वेळ व्यापाराची नक्कीच नाही. आशियातील देशांनी सर्व पर्यायांची पडताळणी केली पाहिजे, असे मत त्यांनी व्यक्त केले.

करोनामुळे आशियाचा विकासदर कदाचित शून्यावर देखील जाईल. मागील ६० वर्षांत पहिल्यांदाच अशी भीषण परिस्थिती ओढावेल, असे री यांनी सांगितले. मात्र इतर खंडांच्या तुलनेत आशियाची कामगिरी बरी राहील. ते म्हणाले की, जागतिक मंदीच्या वेळी व्यक्त केलेला ४.७ टक्के विकासदराच्या अंदाजापेक्षाही प्रत्यक्षात नीचांकी होता. १९९० मध्ये आशियातील आर्थिक संकटावेळी विकासदर १.३ टक्के होता, असे आयएमएफने आपल्या अहवालात म्हटले आहे.

करोना संकटातून सावरून आशियाई अर्थव्यवस्था पुढील वर्षी उभारी घेईल, असा आशावाद आयएमएफने व्यक्त केला आहे. आयएमएफच्या मते पुढील वर्षी आशियाचा विकासदर ७.६ टक्के राहील. अमेरिका आणि युरोपातील मागणी कमी झाल्याने आशियातील निर्यातीला फटका बसेल, असे त्यांनी सांगितले.