वृत्तसंस्था, नवी दिल्ली
बर्कशायर हॅथवे, अॅमेझॉन आणि जे. पी. मॉर्गन चेस या जगातील तीन आघाडीच्या कंपन्या एकत्र येऊन नवीन आरोग्य कंपनी सुरू करणार आहेत. या कंपनीच्या प्रमुखपदी त्यांनी अतुल गावंडे या मराठी माणसाची नियुक्ती केली आहे. अतुल गावंडे वैद्यकीय क्षेत्रात कार्यरत आहेत. या कंपनीचे कार्यालय अमेरिकेतील बोस्टन शहरात असणार आहे. कंपनीचा उद्देश खोऱ्याने नफा कमावणे नसून अमेरिकेतील कर्मचाऱ्यांना कमी दरात चांगल्या वैद्यकीय सुविधा मिळाव्यात हा असल्याचे प्रसिद्धीपत्रकात नमूद करण्यात आले आहे.
अॅमेझॉन, बर्कशायर हॅथवे आणि जे. पी. मॉर्गन चेस या कंपन्यांमध्ये मिळून १० लाख कर्मचारी कार्यरत आहेत. सध्या अमेरिकेतील काही बड्या कंपन्यांकडून आपल्या कर्मचाऱ्यांच्या आरोग्याची काळजी घेण्याचा कल वाढला आहे. त्यामुळे कर्मचाऱ्यांच्या आरोग्याची काळजी विमा कंपनीवर सोडण्याचे प्रमाण घटत असल्याचे दिसून आले आहे. गेल्या वर्षी 'सिस्को'ने 'स्टँफर्ड मेडिकल सिस्टीम'शी करार करून आपल्या कर्मचाऱ्यांसाठी वैद्यकीय सुविधेचे दालन सुरू केले.
⚕कोण आहेत अतुल गावंडे?
पेशाने डॉक्टर असलेले अतुल गावंडे उत्तम लेखक असून बर्मिंगम अँड वुमन्स हॉस्पिटलमध्ये ते नोकरी करतात. एंडोक्राइन शस्त्रक्रियेचे ते तज्ज्ञ आहेत. हार्वर्ड टीएच चान स्कूल, हार्वर्ड मेडिकल स्कूलमध्ये ते प्राध्यापकीही करतात. 'बिइंग मॉर्टल : मेडिसीन अँड व्हॉट मॅटर्स इन द एन्ड' हे २०१४ मध्ये त्यांनी लिहिलेले पुस्तक चर्चेचा विषय ठरले होते.