पॅनकार्ड क्लबच्या मालमत्तांचा लिलाव

नवी दिल्ली ः गुंतवणूकदारांना फसवून सात हजार कोटी रुपयांहून अधिक रक्कम गोळा करणाऱ्या पॅनकार्ड क्लबच्या मालकीच्या सात मालमत्तांचा लिलाव भांडवल बाजार नियंत्रक सेबी सुरू करणार आहे. या मालमत्तांची एकूण राखीव किंमत २८२.१२ कोटी रुपये होते आहे.

पॅनकार्ड क्लबकडून केल्या जाणाऱ्या वसुलीचा एक भाग म्हणून हा लिलाव हणार आहे. लिलाव ई-ऑक्शन पद्धतीने १० जानेवारी २०१८पासून सुरू होईल. यामध्ये पॅनकार्ड क्लब व या कंपनीचे दिवंगत मुख्य व्यवस्थापकीय संचालक सुधीर मोरवेकर यांच्या मालमत्तांचा समावेश आहे. पॅनकार्ड क्लबची कार्यालये तसेच गोवा व महाराष्ट्र येथील हॉटेल यांचा लिलाव याअंतर्गत केला जाईल. या मालमत्तांची विक्री करण्यासाठी एसबीआय कॅपिटल मार्केट्स साह्य करणार आहे.

लिलावात या मालमत्ता खरेदी करण्याची इच्छा बाळगणाऱ्या व्यक्तींनाच संबंधित मालमत्तांचा प्रकार, त्यांच्यावर दाखल झालेले दावे, ताबा व अन्य दायित्वे यांची चौकशी लिलावासाठी बोली लावण्यापूर्वीच करावी लागेल. यासाठी सेबी कोणत्याही प्रकारे जबाबदार राहणार नाही, असे सेबीने स्पष्ट केले आहे.