सहा टक्के व्याज १० कोटींवर!

मुंबई ः खासगी क्षेत्रातील अॅक्सिस बँकेने बचत खात्यावर वार्षिक सहा टक्के व्याज द्यायचे ठरवले आहे. मात्र, या सुविधेचा लाभ घेण्यासाठी संबंधित खातेदाराला खात्यामध्ये किमान १० कोटी रुपये गुंतवणे अनिवार्य करण्यात आले आहे. सोमवारपासून ही योजना झाली.

अॅक्सिस बँकेतर्फे बचत खात्याच्या ग्राहकांना दोनप्रकारे व्याज देण्यात येत आहे. ज्यांच्या खात्यामधील रक्कम पन्नास लाख रुपयांपेक्षा कमी आहे, त्यांना ३.५० टक्के दराने व्याज देण्यात येत आहे. तर, ज्यांच्या बँक खात्यामध्ये पन्नास लाख रुपयांपेक्षा अधिक रक्कम आहे, त्यांना सध्या चार टक्के दराने व्याज देण्यात येत आहे. नव्या निर्णयामुळे बचत खात्यातील रकमेवर सर्वाधिक व्याज देणाऱ्या बड्या बँकांच्या यादीत अॅक्सिस बँकेचा समावेश झाला आहे. सध्या मध्यम ते मोठ्या आकाराच्या बँकांकडून अशाप्रकारचे व्याजदर देण्यात येत आहेत. अशाप्रकारचे व्याजदर देणाऱ्या बँकांमध्ये कोटक महिंद्र बँक, इंड्सइंड बँक आणि येस बँक यांचा समावेश आहे.

बचत खात्यांमधील रकमेवर देण्यात येणाऱ्या व्याजदराविषयीचे नियम २०११मध्ये बदलण्यात आले. तेव्हा बचत खात्यातील रकमेवरील व्याजदर नियंत्रणमुक्त करण्यात आले. या नियमबदलाचा लाभ घेणारी बँक म्हणून स्टेट बँक ओळखली जाते. स्टेट बँकेने लगेचच बचत खात्याच्या व्याजदरात घट केली. स्टेट बँकेने जुलै २०१७मध्ये बचत खात्याचे व्याज दर चार टक्क्यांवरून साडेतीन टक्के केले. त्यानंतर एचडीएफसी बँक आणि आयसीआयसीआय बँकेनेही स्टेट बँकेची वाट चोखाळून व्याजदरांत घट केली.