शेअरमध्ये तेजी; गुंतवणूकदारांची इतकी कमाई

मुंबई : सकारात्मक संकेतांमुळे गुंतवणूकदारांनी केलेल्या जोरदार खरेदीने सकाळच्या सत्रात शेअर निर्देशांकांनी जोरदार उसळी घेतली. मुंबई शेअर बाजाराचा सेन्सेक्स ३४० अंकांनी वधारला. तर राष्ट्रीय शेअर बाजाराच्या निफ्टीत ११० अंकांची वाढ झाली होती. तेजीच्या लाटेत गुंतवणूकदारांच्या मालमत्तेत किमान एक लाख कोटींची वाढ झाली.

आजच्या तेजीने सेन्सेक्सने पुन्हा ४१ हजार अंशांचा स्तर पार केला. आशियातील शेअर बाजारात सकाळी सकारात्मक वातावरण होते. तेजीच्या लाटेत एनटीपीसी, इंडसइंड बँक, टाटा स्टील, एसबीआय, ओएनजीसी, रिलायन्स , एचयूएल, अल्ट्राटेक सिमेंट, एचडीएफसी, एचडीएफसी बँक, एलअँडटी, टीसीएस, पॉवरग्रीड, टायटन, भारतीएअरटेल, बजाज ऑटो, एशियन पेंट्स हे शेअर वधारले. सध्या सेन्सेक्स ३४८ अंकांच्या वाढीसह ४१ हजार २५० अंकांवर तर राष्ट्रीय शेअर बाजाराचा निफ्टी १२१०० अंकांवर ट्रेड करत आहे.

संघर्ष असूनही 'या' शेअरचा परतावा दमदार

निफ्टी ५० मंचावर ३५ शेअर्सनी वर्षभराचा उच्चांक गाठला. श्री सिमेंटच्या शेअरमध्ये ५ टक्के वाढ झाली. त्याचबरोबर आयआरसीटीसीच्या शेअरने ७ टक्क्यांची वाढ नोंदवत सार्वकालीन उच्चांक गाठला. अरबिंदो फार्मा १८ टक्क्यांनी वधारला.

उद्योजक अडचणीत;करोनामुळे सुट्या भागांचा तुटवडा

आर्थिक मंदीतून बाहेर पडण्यास भारताला अपेक्षेपेक्षा अधिक वेळ लागत असल्याचे कारण देत मूडीजने सोमवारी चालू वर्षासाठी जीडीपीचा वृद्धीदर ६.६ टक्क्यांवरून घटवून ५.४ टक्के केला. २०१९ या वर्षासाठी मूडीजने जीडीपी वृद्धीदराचा अंदाज ५ टक्के घोषित केला होता. त्यातच यंदाचा अर्थसंकल्प हा दिशाहीन आणि निराशाजनक असल्याची टीका पंतप्रधानांच्या आर्थिक सल्लागार समितीच्या सदस्या अशिमा गोयल यांनी केली होती. 'बजेट'मध्ये दूरदृष्टीचा अभाव असल्याचे सांगत गोयल यांनी केंद्र सरकारला घरचा आहेर दिल्यामुळे सोमवारी बाजारात नकारात्मक वातावरण निर्माण झाले होते. यामुळे शेअर निर्देशांकात घसरण झाली होती.