बिटकॉइन एक्स्चेंजवर छापे

नवी दिल्ली : प्राप्तिकर खात्याने देशातील बड्या बिटकॉइन एक्स्चेंजवर बुधवारी छापे टाकले. या एक्स्चेंजमध्ये मोठ्या प्रमाणात करचोरीला प्रोत्साहन दिले जात असल्याच्या संशयातून छापे टाकण्यात आल्याचे प्राप्तिकर खात्याच्या अधिकाऱ्यांनी स्पष्ट केले.

प्राप्तिकर विभागाच्या बेंगळुरू शाखेच्या नेतृत्त्वाखाली नवी दिल्ली, बेंगळुरू, हैदराबाद, कोची आणि गुरुग्राम येथील नऊ एक्स्चेंजवर छापे मारण्यात आले. प्राप्तिकर कायद्याच्या कलम १३३ ए अंतर्गत हे छापे मारण्यात आल्याचे वरिष्ठ अधिकाऱ्यांनी नमूद केले. बिटकॉइन एक्स्चेंजवर करण्यात आलेली ही देशातील पहिलीच कारवाई ठरल्याचेही या अधिकाऱ्यांनी स्पष्ट केले. बिटकॉइन या आभासी चलनाला अद्याप केंद्र सरकार आणि रिझर्व्ह बँक यांनी मान्यता दिलेली नसली तरी, देशभर व्यवहार होत असल्याचे उघड झाले आहे. त्यामुळे हे व्यवहार चिंतेचा विषय बनले आहेत.