GST: रात्री १२ ते २ बिग बाजारचा 'ग्रँड सेल'

मटा ऑनलाइन वृत्त । नवी दिल्ली

देशभरातील बिग बाजार आज मध्यरात्री १२ ते २ या वेळेत सुरू राहणार आहेत. निमित्त आहे, क्रांतिकारी जीएसटी कायद्याच्या अंमलबजावणीचं. हा कायदा देशभरात लागू होताच, बिग बाजारची दारं 'जीएसटी मुहूर्त शॉपिंग'साठी उघडली जाणार असून ग्राहकांवर सवलतींचा पाऊस पडणार आहे.

एक देश, एक कर या तत्त्वावर आधारित ऐतिहासिक जीएसटी कायदा वाजतगाजत लागू करण्यासाठी केंद्र सरकारनं आज मध्यरात्री जंगी सोहळ्याचं आयोजन केलं आहे. मध्यरात्री १२ वाजता होणाऱ्या या कार्यक्रमात राष्ट्रपती आणि पंतप्रधान हा कायदा लागू झाल्याची औपचारिक घोषणा करतील. एखाद्या कायद्याच्या अंमलबजावणीसाठी एवढा मोठा सोहळा होण्याची ही पहिलीच वेळ आहे. पण, खरेदीप्रेमींसाठी बिग बाजारानं त्यापेक्षाही शाही सोहळ्याचा घाट घातला आहे. त्यांच्या जीएसटी मुहूर्त शॉपिंगमध्ये वेगवेगळ्या वस्तूंवर किमान २ ते कमाल २२ टक्क्यांपर्यंत सवलत मिळणार आहे. अनेक दुकानांमधील 'सेल' आज संपत असताना, बिग बाजारनं जीएसटी लागू झाल्यावर ऑफर्स जाहीर करून सगळ्यांनाच आश्चर्याचा धक्का दिला आहे.

कोणत्या वस्तू किती स्वस्त मिळणार?

* साखर, सोयाबिन तेल, तूरडाळ, काचेचे ग्लास आणि साफसफाईच्या सामानावर किमान ५ टक्के सवलत

* साबण, केसांचं तेल, बिस्किट, चहा आणि डेअरी उत्पादनं मिळणार दहा टक्के स्वस्त

* टूथपेस्ट, डायपर्सवर १५ टक्क्यांची सवलत

* उदबत्ती, काजू, पॅकबंद भाज्यांवर किमान २२ टक्के सवलत