जेफ बेजोसनी एका झटक्यात गमावले ८० हजार कोटी; गौतम अदानींना होणार मोठा फायदा

मुंबई: अमेरिकेच्या शेअर बाजारात मंगळवारी झालेल्या मोठ्या घसरणीमुळे इलॉन मस्क आणि जेफ बेझोस यांना मोठा झटका बसला. शेअर बाजारातील या घसरणीमुळे त्यांच्या संपत्तीत फार घट झाली आहे. जागतिक श्रीमंतांच्या क्रमवारीत अव्वल स्थानावर असलेल्या या उद्योजकांच्या स्थानाला यामुळे धक्का बसण्याची शक्यता आहे.

जगातील सर्वाधिक श्रीमंत आणि इलेक्ट्रिक कार कंपनी टेस्लाचे सीईओ असलेल्या मस्क यांच्या एकूण संपत्तीत ८.३५ अब्ज डॉलरची घट झाली आहे. त्यांची एकूण संपत्ती आता २५६ अब्ज डॉलर इतकी आहे. त्याचप्रमाणे ॲमेझॉनचे संस्थापक बेझोस यांची संपत्ती ९.८४ अब्ज डॉलर (सुमारे 80 हजार कोटी) ने कमी होत १५० अब्ज डॉलर झाली आहे. दुसरीकडे, आशिया आणि भारतातील सर्वात मोठे श्रीमंत व्यक्ती गौतम अदानी यांची एकूण संपत्ती मंगळवारी १.५८ अब्ज डॉलरने वाढून १४७ अब्ज डॉलरवर पोहोचली. अशाप्रकारे अदानी आता जागतिक श्रीमंतच्या क्रमवारीत दुसर्‍या क्रमांकावरून बेझोस यांना हटवण्याच्या जवळ आले आहेत. आता दोघांच्या संपत्तीत फक्त तीन अब्ज डॉलर्सचा फरक आहे.

जगातील श्रीमंतांच्या यादीत अदानी झपाट्याने पुढे जात आहेत. फेब्रुवारीमध्ये ते मुकेश अंबानींना मागे टाकत आशियातील सर्वात श्रीमंत व्यक्ती बनले. एप्रिलमध्ये, त्यांच्या एकूण संपत्तीने १०० अब्ज डॉलरचा आकडा ओलांडला आणि गेल्या महिन्यात त्यांनी मायक्रोसॉफ्टच्या बिल गेट्स यांना मागे टाकून जगातील श्रीमंतांच्या यादीत चौथ्या क्रमांकावर पोहोचले. अलीकडे, ते फ्रेंच उद्योगपती बर्नार्ड अर्नाल्ट यांना मागे टाकत तिसऱ्या स्थानावर गेले. आता तो बेझोस यांच्या अगदी जवळ पोहोचले आहेत. ज्या प्रकारे त्याची एकूण संपत्ती वाढत आहे, त्यामुळे ते लवकरच बेझोस यांना देखील मागे टाकू शकतात.

अदानींची संपत्ती वाढली

ब्लूमबर्ग बिलियनेअर्स इंडेक्सनुसार, ६० वर्षीय अदानी यांची एकूण संपत्ती १४७ अब्ज डॉलर झाली आहे. अदानीची एकूण संपत्ती या वर्षी ७०.३ अब्जने वाढली आहे. तेल आणि नैसर्गिक वायूच्या किमती वाढल्याने अदानीच्या एकूण संपत्तीत वाढ झाली आहे. दुसरीकडे, मस्क आणि बेझोस यांच्या संपत्तीत यंदा घट झाली आहे. मस्क यांच्या संपत्तीत १३.९ अब्जची घट झाली तर बेझोस यांची संपत्ती ४२.२ अब्जने घसरली. दरम्यान, देशातील सर्वात महत्त्वाची आणि मोठी कंपनी रिलायन्स इंडस्ट्रीजचे चेअरमन मुकेश अंबानी ९३.७ अब्ज डॉलर संपत्तीसह नवव्या क्रमांकावर पोहोचले आहेत.

जलद गतीने संपत्तीत वाढ

एप्रिल २०२० पासून अदानी समूहाचे काही शेअर्स १००० टक्क्यांपर्यंत वाढले आहेत. यामुळे अदानीची संपत्ती रॉकेटच्या वेगाने वाढली आहे. जगातील श्रीमंतांच्या यादीत तिसऱ्या क्रमांकावर पोहोचणारे ते आशियातील पहिले व्यक्ती आहेत. अदानी ग्रीन एनर्जी आणि अदानी टोटल गॅस ७५० पट पेक्षा जास्त नफ्यात व्यापार करत आहेत; तर अदानी एंटरप्रायझेस आणि अदानी ट्रान्समिशनने त्यांच्या मूल्यांकनाच्या टप्प्यात ४०० पट वाढ केली आहे. तुलनेत, मस्क यांच्या टेस्ला आणि बेझोस यांच्या ॲमेझॉनच्या किंमती आणि कमाईचे प्रमाण सुमारे १०० पट आहे, तर मुकेश अंबानींच्या रिलायन्स इंडस्ट्रीजचा व्यापार २८ पट आहे.

अदानींचा व्यवसाय

अदानीं यांनी अलिकडच्या वर्षांत आपला व्यवसाय लक्षणीयरीत्या वाढवला आहे. त्यांनी डायमंड ट्रेडिंगमधून व्यवसाय सुरू केला पण नंतर कोळसा व्यवसायात ते सामील झाले. आज त्यांचा समूह कोळशापासून बंदरे, मीडिया, सिमेंट, ॲल्युमिना आणि डेटा सेंटरपर्यंतचा व्यवसाय करत आहे. अदानी समूह हा मार्केट कॅपनुसार देशातील दुसरा सर्वात मोठा समूह बनला आहे. हा समूह देशातील खाजगी क्षेत्रातील सर्वात मोठा बंदर आणि विमानतळ ऑपरेटर समूह आहे. यासोबतच सिटी गॅस वितरण आणि कोळसा खाणकामातही ते पहिल्या क्रमांकावर आहेत. अदानी समूहानेही हरित ऊर्जेवर ७० अब्ज गुंतवणुकीची घोषणा केली आहे.